Richella Dorothal, Director Interino di D.T.I.
ORANJESTAD (AAN): Siman pasa, Departamento di Impuesto y KPA a anuncia fecha cu lo cuminsa controla number valido pa vehiculonan di motor cu ta core riba nos careteranan. Departamento di Inspeccion Tecnico (D.T.I.) den un entrevista recien a indica cu D.T.I., entrante e fecha stipula, 1 di october, tambe lo haci e control riba e plach’i number nobo di auto.
Richella Dorothal, Director Interino di D.T.I. a enfatisa cu e plach’i number mester ta esun otorga door di DIMP y no por ta sticker ni carton of otro material, a menos cu tin documentacion di DIMP cu tin un motibo valido pa esaki. A base di e ley existente, D.T.I. durante di un keuring ta verifica si e plachi di number ta esun valido y si tin un luz riba dje. Mester tin documentonan valido entre otro seguro valido y e keuringsbewijs.
Señora Dorothal a indica cu te cu actual, luna di september, tin mas o menos un 75 porciento di keurmento compara cu aña pasa. Tambe e cantidad di keurmento ta baha, cu ta nifica cu hopi ciudadano no ta haci of acudi na citanan di keurmento. For di e controlnan cu lo tuma luga, lo sali afo tambe cu hopi ciudadano ta core vehiculo cu no ta gekeur.
Ya tin citanan haci te cu fin di october. Señora Dorothal ta conseha tur ciudadano pa haci cita mas tempran posibel prome cu e fecha di vencemento. Pa locual cu ta e demanda, D.T.I. ta purba di acapara mas miho posibel y hinca algun diasabra tambe aden pa atende mas tanto e companianan grandi y ‘car rentals’.
