Director di ImSan celebrando 'milestone' --- *140 ta hende muher cu tabata tin cancer di pecho
ORANJESTAD (AAN): Dr. Joel Rajnherc, Director di Instituto Medico San Nicolas (ImSan) tabata masha contento di por a tene un bunita actividad den cuadro di e dia mundial di Bisti na Roos (Wear it Pink).
Esaki kiermen cu mundialmente tur hende cu tin pashentnan cu ta sufri di cancer di pecho ta haci algo pa concientiza tur hende y pa purba recauda mas fondo pa sigui cu e investigacionnan pa mehora e tratamentonan y e manera di biba di e pashentnan cu cancer na pecho, a bisa.
ImSan tambe a scoge pa concientiza comunidad di e sufrimento di tur pashent cu tin cancer y principalmente e pashentnan cu cancer di pecho.
"Bisando esey mi recorda cu for di dia 1 di April 2020, ongeveer 18 luna pasa, ImSan por fin por a cuminsa cu tratamento di bestraling pa tur nos pashentnan akinan na Aruba. For di e momento ey nos no tabata tin cu manda pashent den cantidad grandi mas afo", Dr. Rajnherc a indica.
El a agrega cu ta algun excepcion unda cu mester a manda un of dos pashent afo pa wordo trata.
E siman aki el a haya e noticia di e departamento di Radioterapia cu ya a caba e tratamento cerca 300 pashent caba na Aruba, cu ta masha hopi mes, a enfatisa. A surpasa tur pronostico cu tabata tin. Di esey, 140 pashent ta hende muher cu tabata tin cancer di pecho.
A sigui bisa cu esey ta dos biaha mas cu hende homber na Aruba, unda e cancer predominante ta e cancer di prostaat.
Dr. Rajnherc a indica cu e cifranan aki ta pone masha cla pa pakico Aruba tin derecho riba un departamento di radioterapia aki na Aruba.
Pesey diabierna a celebra hunto cu e trahadornan di ImSan e fecha aki. Pa esaki a bin hopi sugerencia te hasta pa verf henter ImSan roos. Asina Ambulans a bin cu e sugerencia pa 'wrap' un ambulans.
E medico a laga sa cu door di e pandemia, hopi hende muher no a bay na ora cerca nan specialista pa haya un diagnostico. "Mas tempran bo saca e diagnostico, mas mihor e resultado di e tratamento ta, a remarca.
Awendia e tratamentonan di cancer di pecho ta asina sofistica cu e tasa di sobrevivencia ta hopi halto.
Di e forma ey, e director di ImSan a introduci un ambulans cu ta significa: 'ImSan Cares, ImSan Gives Care and you meet care at ImSan'. Nan ambulans ta 'gewrap' den roos dunando apoyo na tur ser femenino cu a sufri of ta sufri di cancer di pecho.
ImSan kier concientisa comunidad riba e malesa di cancer di pecho y ta hopi orguyoso riba e hecho aki.
Dr. Joel Rajnherc a gradici hefe di departamento di Ambulans Liberato Hoek cu a bin cu e bunita idea como tambe na e compania cu a haci e trabao.
Hoek a agrega cu e idea tabata tey for di aña pasa y kier a haci esey pa e inauguracion di e departamento di radioterapia. Pero pa motibo di e pandemia no por a sigui cu esey.
E ora a pospone e proyecto pa luna di October y asina duna sosten na e campaña di 'breast cancer awareness'.
E ambulans ta bay keda core pa un periodo basta largo. Pa Aruba kisas esaki ta algo nobo, pero pa otro parti di mundo ta conoci caba.
E ta keda un vehiculo di emergencia, cu su sirena y comunidad tin cu bay custumbra cu nan ta wak un otro color di auto cu ta geel, pero e ta un vehiculo di emergencia cu tambe lo yega cas di hende of cu lo atende cu algun incidente riba caminda of na Hospital, Liberato Hoek a splica.
