Nurianne van der Griend:
ORANJESTAD (AAN) Nurienne van der Griend, miembro di e Directiva di Fundacion Diabetico Arubano (FDA) den su entrevista cu Matutino DIARIO a sigui bisa cu, den su opinion, tin hopi factor cu ta hiba na haci cierto scogencia, pa loke ta alimentacion, den nos bida diario.
“Mas nos ta scoge pa cuminda cu ta saludabel, menos vet, menos sucu agrega, miho pa nos curpa. Mi ta motiva tur hende pa segun nan alcance, nan capacidad, pa scoge cuminda cu ta haci nan curpa miho, y tambe pa evita subi e riesgo pa diabetes.
“Nos no por bisa kico ta e motibo exactamente pa diabetes, pero nos sa cu, principalmente den nos cultura, nos ta haci scogencianan di cierto alimentonan cu, kizas, ta menos beneficioso pa e curpa.”
“Mi ta bisa ‘modera, baha un poco e cantidad; ami como persona cu ta biba cu diabetes, mi no ta bisa cu mi ta nenga tur ora, pero si mi ta haci un choice. Mi ta dicidi di no hacie tur dia, no den tur fiesta, no dia di fiesta den December, por ehempel, pero ora mi ta bebe awa, mi ta come menos, of bisa un biaha si, otro biaha no. Esey ta maneranan cu bo por adapta bo estilo di bida”, Nurianne a señala.
Campaña ‘Check’e!’: Esaki ta e nomber di e campaña di Fundacion Diabetico Arubano, durante e luna aki. “Si bo ta sinti cu bo tin algun señal of sintoma di Diabetes cu lo por indica cu bo tin Diabetes: Check’e! Si bo no conoce e sintomanan of bo no sa mucho di Diabetes, Check’e! Y tambe principalmente, si bo no a haci un chekeo pa hopi tempo of ta algo cu bo no a pone atencion riba dje, check’e! Nos kier pa nos hendenan ta mas conciente di nan curpa, y cu nan ta sinti con nan curpa ta reacciona na cierto punto di estilo di bida, p’asina bo por evita cu bo tin e condicion di diabetes, of kizas otro condicion mes, un poco mas laat.”
“Mas trempan bo sa si bo tin diabetes of no, mas pronto bo por maneha bo diabetes y evita complicacion. Pesey e campaña yama Check’e,” Nurianne a remarca.
Fundacion Diabetico Arubano ta educa, motiva hendenan pa motiva otronan pa check nan salud y cuida nan salud na prome lugar cu tur cos.
