Aruba uzando tecnologia moderno den proyecto pa recoge data geografico di resolucion halto

Frank Pichel, Managing Director di The Place Foundation:

ORANJESTAD (AAN): Departamento di Obra Publico (DOW) a inicia un colaboracion strategico cu The Place Foundation pa recoge data geografico di resolucion halto na Aruba. E proyecto tin como meta pa fortalece planificacion, infrastructura y maneho di teritorio cu tecnologia moderno y data di calidad superior.

   Segun señor Frank Pichel, Managing Director di The Place Foundation, nan organizacion ta traha cu gobiernonan pa facilita e coleccion di imagen ultra detaya. Normalmente, e tipo di data aki ta hopi costoso, ta tuma tempo y ta dificil pa adkiri. Door di e colaboracion aki, Aruba lo tin acceso na informacion geografico avansa cu lo keda den posicion completo di gobierno.

   Señor Pichel ta splica den un entrevista cu DIARIO cu e proyecto ta enfoca riba dos tipo di data principal. Prome, imagen “street view”. Un ekipo ta core tur caminda di e isla, aproximadamente 1,200 kilometer di caminda, cu camara 360 grado monta riba e vehiculo. E sistema ta similar na loke hopi hende conoce di plataforma internacional, pero den e caso aki, e data lo pertenece totalmente na gobierno di Aruba.

   Di dos ta imagen aereo di resolucion hopi halto cu dronenan special. Segun señor Pichel, cada pixel lo representa entre 3 y 10 centimeter, loke ta permiti un nivel di detaye extraordinario pa planificacion urbano, maneho ambiental y desaroyo di infrastructura.

   El a enfatisa cu Gobierno lo ta doño di e data completamente y no tin restriccion di licencia y por haci cu ne loke e ta desea. Esaki ta facilita pa comparti cu otro departamento y entidad relevante.

   Segun señor Pichel, The Place Foundation a ehecuta proyectonan similar den por lo menos 12 pais. Cada destino tin su reto unico. Na Aruba, e reto principal ta e biento. E ekipo tecnico ta monitorea condicion meteorologico pa identifica e momento ideal ora e biento baha, pa sigura calidad optimo di imagen. E coleccion di data ta proyecta pa dura entre cuatro te cinco siman. E street view probablemente lo completa den tres siman, mientras e parti aereo por tuma un poco mas tempo. Pa minimisa impacto di biento fuerte na altitud halto, e ekipo a decidi pa bula na altitud mas abou cu originalmente planifica.

Ademas, e espacio aereo ta cubri aproximadamente 500 meter for di costa, a peticion di gobierno. Den e parti di lama, e tecnologia por capta imagen halto den profundidad relativo, cu por aporta na informacion valioso pa planificacion maritimo y ambiental.

   Cu e inversion aki den tecnologia y data, Aruba ta posiciona su mes como un pais cu ta pensa dilanti, construyendo riba base solido di informacion preciso, moderno y estrategico.