Segun Dalgis Montalvo di Stichting HUNTO:
Pa hopi aña Aruba a keda pega cu e parti preventivo
ORANJESTAD (AAN): Adictonan ambulante na Aruba ta representa un reto social y humano cu ta pidi un acercamento structural y sostenibel. E situacion ta afecta tanto e persona mes como nos comunidad, y ta exigi accion coordina entre instancia publico y social, cu enfoke riba rehabilitacion, dignidad humano y reintegracion responsabel den sociedad. Pa esaki ta posibel, prevencion mester tin prioridad.
Señora Dalgis Montalvo di Stichting Hunto, den un entrevista cu DIARIO a splica riba e crecemento notabel di Adictonan Ambulante riba nos isla. Segun e, actualmente den Oranjestad, tin mas o menos 75 persona adicto cu ta canando den diferente hotspot den e area. Na San Nicolas, tin mas o menos 60 adicto ambulante y 150 of mas adicto ambulante otro parti di e isla. Esaki, el a bisa, ta sin conta esnan cu por ta biniendo, cu ta e hobennan cu ya caba ta den man di husticia cu ya ta birando adicto. El a enfatisa, cu e grupo di adictonan ambulante ta creciendo.
Segun señora Montalvo, tin hopi factor cu ta hunga un rol cu hobennan ta cay den adiccion, entre otro, falta di guia, falta di nucleo familiar, falta di presencia y guia di un tata, hopi tin mama so cu ta cria nan, presion di amistad, presion di medianan social y hopi otro motibo mas.
El a agrega cu pa varios aña caba Stichting Hunto ta vociferando cu instancianan mester traha hunto haciendo nan parti di trabou. Un organisacion su so no por carga henter e problematica aki. Mas ainda, el a indica, cu e trabou aki mester cuminsa for di famia, scol, y diferente ministerionan. “E ta un trabou unda cu tur instancia echt tin cu sinta hunto y di berdad ta practico y realistico den kico ta e necesidad cu tin eyfo y stop di punta dede riba otro y ban di berdad busca solucion pasobra e cos aki no solamente ta creciendo, e ta un monster caba”, el a expresa.
Señora Montalvo a enfatisa cu ta pa e motibo aki mes, e parti preventivo ta importante. Apesar por ta cu no ta wak e efecto di e parti preventivo di biaha, motibo tambe pa cua hende lo no kere den dje, pero cu su tempo lo ripara con e parti preventivo ta traha. Y den esaki, señora Montalvo a expresa, ta unda na Aruba nos a keda pega pa hopi aña.
