ORANJESTAD (AAN): Aruba ta sigui destaca como un destinacion prominente den Caribe pa su beachnan.
Siman pasa un publicacion a bay viral riba social media door di e pagina social di Beaute Caraïbe. E publicacion, cu ta pone luz positivo riba diferente pais den Caribe cu ta conoci pa nan beachnan, a genera hopi interaccion y a activa curiosidad den beachnan den region.
Aunke Beaute Caraïbe y e hashtag cu nan ta uza; #FeastAndFly, no ta afilia na autoridadnan oficial di turismo, nan ta funciona como plataformanan di influencia digital cu ta comparti y amplia contenido di biahe den Caribe pa un audiencia grandi internacional. Nan manera visual di crea contenido ta contribui directamente na e percepcion di biaheronan ora di scoge destinacionnan pa medio di e mundo digital.
E mencion di Aruba den e contenido aki, ta confirma un biaha mas e reputacion internacional di Aruba pa su beachnan limpi, awa trankil y cristalino, santo blanco, y clima consistente cu solo cayente henter aña. Eagle Beach frecuentemente a ricibi reconocemento internacional, poniendo Aruba den e posicion como destinacion preferi pa amantenan di solo y lama.
Expertonan di turismo ta indica cu exposicionnan organico di medionan social, manera esun aki, ta hunga un rol importante pa biaheronan ora di tuma decision y planea nan destinacion di biahe. E visibilidad digital di Aruba den e publicacion aki, ta subraya e presencia atractivo y fuerte di Aruba den e mercado turistico den Caribe.
