Parlamentario Jennifer Reyes:
ORANJESTAD (AAN): Segun sra Arends-Reyes kende semper tabata tin un afinidad cu nos pilar economico di Turismo tin su punto di bista tocante e desaroyonan riba nos isla di Aruba. Aruba ta na un crusada importante den su pilar economico, caminda cu nos tin inversionan cuantioso a ser hasi cu meta turistico.
Awor mester purba yega na un balance urgente cu ta mantene nos pilar economico caminda por mantene trabou, mehora infrastructura, mantencion di nos destinacion y inversionnan den renovacion, impulsa proyectonan nobo manera Port City y desaroyo di San Nicolas. Na mesun momento hunto cu entre otro e stakeholdernan manera ATA, AHATA y AAA pa planea con nos destinacion di Aruba por mercadea Aruba como un destinacion cu ta priorisa concientisacion pa cuida nos naturalesa, stima nos cultura, brasa nos localnan cu tin storianan bunita pa comparti, cu tin talentonan pa comparti y asina stimula tambe e economia creativo.
Hunto cu nos huespednan tin un compromiso pa cuida nos isla, contribui na nos economia mientras nan ta disfruta di nos isla y yuda nos isla progresa mientras cu nan ta riba nos isla y laga nan sinti bon bini cu e calor humano cu nos ta conoci pe. Nos mester capitalisa ariba e synergia di responsabilidad comparti pa yuda nos conserva nos isla. Tambe e doñonan y ehecutivonan di hotelnan tambe mester ta na altura cu nos isla ta rekiri un maneho hopi mas concentra ariba e capital humano, e trahadornan.
Inverti mas den e trahadornan, nan salud, nan famia, yiunan y nan estudio. E responsabilidad corporativo social tin cu bin hopi mas dilanti. E calidad di bida y trato na nos localnan tin cu bai man den man cu e experiencia di nos huespednan. Pa 2025 AHATA ta premira cu por mantene 81% di grado di ocupacion di cambernan y si nos por mantene nos REVPAR actual $297,51 of cerca lo por compensa pa costonan di operacion. Tin diferente reto di capacidad y risico geopolitico den region pero asina mes nos mester pusha pa logra añanan cu exito cu tin cambionan positivo cu nos localnan tambe por sinti.
