*Linea crusero di Ritz Carlton ta yega Aruba na November
ORANJESTAD (AAN): Minister di Turismo demisionario, Dangui Oduber a duna di conoce cu e discusion riba kico ta e capacidad di carga di e isla ainda ta vigente. Cuanto taxi por duna permiso, cuanto hotel por traha, cuanto vergunning di UTV's por duna, kico ta e daño ta na naturalesa y medio ambiente y con sostenibel esaki ta pa turismo na termino largo.
Oduber a laga sa cu Oficina di Turismo a haci un estudio riba e capacidad di carga (carrying capacity) y pesey a bisa cu un desaroyo sostenibel na Aruba ta no mas hotel grandi. Mester ta hotelnan chikito di entre 50 pa 75 camber pasobra sino e no ta sostenibel mas pa e infrastructura ni pa e fondonan social, di pension, di vivienda y e cantidad di scolnan cu tin.
Esaki tambe ta aspectonan cu Aruba Ports Authority (APA) tambe ta tene cuenta cu ne ora ta negocia e reservacionnan di aña 2021 bay dilanti. Ta tene cuenta cu e estudio cu a wordo haci di 'carrying capacity' di ATA pa cantidad di turista crusero cu Aruba por ricibi ya cu esaki ta pone un peso riba e infrastructura.
Ta mira con e camindanan ta congestiona. Tin mas hopi UTV's cu por causa daño na naturalesa.
Den añanan bon Aruba tabata ricibi riba 10 mil turista riba un solo dia. Tur esaki ta aspectonan cu ta tene cuenta cu ne pa e reservacionnan pa futuro, a remarca.
CRUSERO RITZ CARLTON TA YEGA NA NOVEMBER
E mandatario a laga sa cu pesey tabata den negociacionnan cu e linea crusero di Ritz Carlton y si tur cos ta bon na November Aruba ta bay ricibi e linea crusero aki, cual ta uno 'upscale' cu no ta trece miles di turista, pero ta trece turistanan di calidad cu ta desea pa bin Aruba y gasta laga placa den e economia di Aruba, a señala.
Minister Oduber a sigui bisa cu den tur e aspectonan aki ta tene cuenta cu Aruba su capacidad.
Ya caba a experencia kico ta nifica 900 mil turista y kico ta e peso cu e ta pone riba infrastructura na e momento ey y pesey ta tene e debido cuenta cu esaki y cu kier un desaroyo cu ta sostenibel y cargabel den tur sentido di e palabra.
Si ta djis sigui crece riba volumen, e no lo ta sostenibel mas den ningun sentido. Kier crece den un manera responsabel y riba calidad, no riba cantidad.
