Problema di abandono di bestia ta persisti
ORANJESTAD (AAN): E problema di bestia riba caya y cachonan bandona y pushinan sin doño ta sigui crece na Aruba, a pesar di esfuersonan pa controla e situacion. Tur aña, organisacionnan di proteccion di bestia ta registra mas caso di abandono y mal cuido, loke ta mustra cu e desafio ta un asunto persistente.
Segun organisacionnan di proteccion animal local, falta di sterilisacion ta keda un di e motibonan principal tras di e incremento di populacion di bestia sin doño. Tur dia nan ta ricibi notificacion di cacho y pushinan bandona. Sin un programa mas fuerte y sostenibel, no por ataca e problema di raiz.
E situacion tambe tin un impacto riba salud publico y seguridad. Bestia di caya por causa accidente den trafico of haci daño na bestia domestico (di otro hende of cabrito, por ehempel). Pushinan sin cuido por multiplica lihe, loke ta trece mas presion riba e organisacionnan di proteccion cu no facilmente por atende cu e demanda pa asistencia.
Gobiernonan a traha riba campaña pa stimula sterilisacion y pa promove adopcion, pero e reto ta exigi tambe un cambio den comportacion di comunidad. Responsabilidad di cuido ta depende no solamente di ley, sino di consenshi y accion di tur habitante.
E problema di bestia di caya na Aruba, cu tin decadanan di historia, ta pidi un esfuerso colectivo: un combinacion di politica publico, cuido continuo y un actitud mas responsabel di parti di comunidad.
Potret: Facebook Page di Luna Foundation Aruba cu ta ilustra un cantidad di 10 puppy cu a wordo gedump diadomingo hunto cu nan mama na Sabania Abao.
