Aruba ta tumando medida preventivo pa evita brote di Dengue

Ministro Dangui Oduber

• DVG ta sigui keda vigila e desaroyo di cerca
• Comunidad por yuda stop transmision di Dengue 

ORANJESTAD (AAN): Recientemente Ministerio di Turismo y Salud Publico di Aruba a tuma nota di aumento di Dengue na Curacao, unda lamentablemente ya a raporta tres morto.

   Pa preveni y pa Aruba ta na tempo, minister Oduber ya a duna Gele Koorts en Muskiet Bestrijding (GKMB) instruccion pa intensifica e medidanan preventivo, mirando e cantidad creciente di caso na Aruba.

   Aunke na e momentonan aki no tin ningun brote di Dengue na Aruba, ta di importancia crucial pa nos haci tur cos posibel pa preveni esaki. Pesey mes, Ministerio di salud ta haci un yamada na pueblo pa hunto nos sea responsabel y nos combati criadero di sangura.

    Ministerio di Turismo y Salud Publico di Aruba hunto cu DVG ta continua monitoria e situacion di cerca y lo tuma medidanan adicional si mester. Ta pidi colaboracion di henter comunidad pa preveni un brote di Dengue na Aruba.

  Ta esencial pa sigui e medidanan preventivo cu a ser comparti pa autoridadnan:

Tira afo of warda tur obheto cu por retene awa, manera baki, taira di auto y pochi mata.  Controla tur caminda paden of pafo di cas cu por tin awa para cu lo por bira un criadero di sangura. Proteha bo mes contra picanan di sangura door di bisti paña cu manga largo y pia largo, usa repelente di insecto y fliet paden di cas, camber y tur area cu bo ta frecuenta regularmente cu producto  pa mata sangura.

   Ta conseha publico pa keda atento di sintomanan di Dengue y si tin e minimo sospecho di infeccion, consulta di biaha cu bo Docter di Cas.

   Tabata dos siman pasa cu DIARIO a trece e informacion cu Seccion di Epidemiologia y Investigacion  di Departamento di Salud Publico na Aruba a emiti un boletin, pa splica cu nan ta mirando un aumento leve den casonan sospechoso di Dengue na Aruba, esaki basa riba dato nan ricibi for di un sistema nobo di vigilancia cu ta monitor sintomanan cu Docternan di Cas ta raporta y resultadonan di laboratorio tambe ta confirmando casonan positivo.

   Den region tambe esaki ta tumando lugar caminda diferente pais ta registrando aumento di caso nan sospechoso di Dengue. Apesar cu e temporada ta seco sin mucho yobida,  seccion di GKMB tambe ta informa cu nan ta hayando criaderonan di sangura rond di cas particularmente cerca ciudadanonan cu ta colecta awa pa planta of muha mata. E containernan cu mas ta ser encontra cu criadero di sangura ta hemchi y bari cu awa.

   Proteha bo mes pa bo no haya Dengue, esaki bo por haci door di: (*) Bisti paña cu manga y pia largo durante oranan di atardi pa anochi. (*) Uza repelente contra sangura riba cuero cu no ta cubri cu paña. (*) Den espacio pafo di cas cende un mecha of uza bela contra sangura. (*) Cera porta y bentana di cas prome cu bira scur of uza screen. (*) Evita di bishita areanan unda bo ta consciente cu tin hopi sangura. (*) Fliet paden di cas, camber, oficina y areanan cu bo ta frecuenta regularmente cu producto pa mata sangura.

   Proteha otronan rond dibo ora cu bo tin sintomanan di Dengue of tin Dengue. Esaki bo ta haci door di bay bo dokter di cas pa confirma si bo tin Dengue y evita di worde pica pa sangura. E sintomanan ta entre otro:

(*) Keintura.

(*) Dolor di cabes.

(*) Biramento di stoma of sacamento.

(*) Diarrea.

(*) Dolor di weso, joints y musculo (dolor di curpa).

(*) Dolor di wowo.

(*) Rash.

  Si bo tin un of mas sintoma nan ariba menciona, acudi na bo dokter di cas pa e por evalua bo. Ta importante pa bo informa bo dokter di cas ki dia bo a cuminsa sinti malo pa asina e por haci test nan adecua di laboratorio.

   Si bo Docter diagnostica bo persona sospecho di Dengue, tuma nota di lo siguiente: (*) Evita di worde pica door di sangura.  (*) Paracetamol ta e unico remedi cu bo por bebe, otro pilder nan por causa sangramento (manera ibuprofen, diclofenac, etc).  (*) Bebe hopi likido pa mantene bo mes hidrata.  (*) Sosega lo mas posibel.