Aruba ta preparando participacion durante MondiaCult 2025 na Barcelona

ORANJESTAD (AAN):  Biblioteca Nacional Aruba a duna di conoce cu MondiaCult ta wordo realisa cada 3 aña.

E ta un conferencia mundial tocante maneho Cultural y Desaroyo Sostenibel organisa pa UNESCO. E biaha aki e lo tuma luga na Barcelona, Spaña entre e dianan 29 di September y 1 di October. Lidernan cultural representando diferente pais, entre nan Aruba, lo alinea un agenda global pa Cultura den e siguiente decada.

Den cuadro di MondiaCult 2025 a tuma lugar un sesion interactivo diabierna mainta caminda representantenan di varios departamento y stakeholders a reuni pa pone ideanan hunto, duna 'input' pa loke ta trata e participacion di Aruba durante e evento importante aki.

Pakico MondiaCult 2025 ta importante pa Aruba?  Pasobra asina por identifica entre otro, practicanan ehemplar, reto, oportunidad y acionnan.

E sesion di diabierna lo yuda delinea e maneho riba temanan manera:

- Derecho cultural y cultura pa promove paz.

- Cultura y Educacion.

- Herencia Cultural y situacionnan di crisis y cambio climatico.

- Transformacion Digital, Inteligencia Artificial y Cultura.

E delegacion cu lo representa Aruba lo bay Barcelona cu un maleta yen cu informacion importante pa comparti y pa pone e nomber di Aruba na halto na nivel mundial.

Biblioteca Nacional Aruba ta masha contento di por duna un aporte cu un presencia di tres persona for di su departamentonan trahando cu e patrimonio documental di Aruba,  Biblioteca Nacional Aruba dept. Arubiana-Caribiana + Digital Collections, na e sesion aki preparando e caminda pa e participacion di Aruba durante MondiaCult 2025. 

 Abo tambe tin chens pa aporta via e link aki: https://forms.office.com/r/9YGknyP6MZ

Yena e encuesta y expresa bo opinion tocante desaroyo cultural na Aruba!