Aruba ta posee un gran potencial den e industria creativo

Edjean Semeleer ta resalta e impacto cultural y social di talento local

ORANJESTAD (AAN): Edjean Semeleer, artista local y Co-Fundado di Go Cultura Foundation, a expresa su entusiasmo pa e exito di e prome edicion di Creactivo Conference 2024, un evento cu ta enfoca riba e potencial di e industria creativo di Aruba y su importancia pa diversifica e economia y desaroya e cultura di e isla.

            Den un entrevista cu DIARIO, Semeleer a splica cu e conferencia ta parti di un esfuerso mas grandi pa crea conscientisacion riba e importancia pa diversifica e economia, y di e papel cu e industria creativo por haci no solamente den turismo, pero tambe den e transformacion social cu ta necesario pa Aruba sigui desaroya.

            "Nos ta convenci, a pesar cu nos no tin e data ainda, cu Aruba tin hopi talento y creatividad. Nos ta kere tambe cu formalisa e industria creativo ta importante, pa asina hopi hende cu ta traha den e economia informal por sali. E strategianan pa desaroya e industria lo yuda pa e sector logra mas exito. Esaki lo no solamente tin un impacto grandi riba turismo, pero tambe lo yuda cu otro aspecto importante di nos isla", Semeleer a declara. 

Un movimiento pa transformacion cultural

            El a destaca cu e conferencia ta solamente e inicio di un movimento mas grandi, cu ta envolve un grupo di hende cu tin e mesun vision pa pusha e crecimento di e sector creativo.

            "Nos ta hopi contento cu e participacion di tur hende presente. Nan presencia aki ta significa hopi pa nos", el a bisa, subrayando e importancia di forma aliansa y uni esfuerso pa avansa den e consolidacion di e industria cultural. 

Proyectonan pa futuro: 'Mapping' di e industria creativo

            Pa futuro, Semeleer a splica cu un di e proximo pasonan lo ta realisa un 'data mapping' di e industria cultural y creativo di Aruba. E proyecto aki, cu ya a cuminsa, tin como meta identifica ken ta forma parti di e sector, kico ta nan impacto y kico ta nan necesidadnan pa sigui crece.

            "Nos ta den fase di colecta data pa compronde ken ta forma parti di e industria, kico ta nan impacto, y kico ta nan necesidadnan pa sigui desaroya. E meta final ta pa fortifica y empodera esnan cu ya caba ta den e sector, y eventualmente, crea mas ingreso y exporta productonan y servicionan cultural",  Semeleer a agrega. 

Investigacion pa desaroyo di e sector

            E proyecto di 'mapping' ta ricibiendo fondo for di Aruba Tourism Authority y lo wordo ehecuta den colaboracion cu un partner cu lo wordo anuncia pronto. E investigacion ta enfoca no solamente riba e impacto economico di e industria creativo, pero tambe riba su capacidad pa transforma e sociedad arubano den un espacio mas diverso y culturalmente rico, Edjean Semeleer a conclui.