Space and Nature Aruba Foundation:
*E cometa no ta solamente un fenomeno unico, sino tambe historico
ORANJESTAD (AAN): Durante la luna di october, e amantenan di astronomia na Aruba lo tin e oportunidad pa mira un evento celestial espectacular. E cometa C/2023 A3 (Tsuchinshan-ATLAS) lo pasa den nos shelo entre mita di october te fin di luna. Esaki lo ta un evento unico, ofreciendo e oportunidad pa wak un di e cometanan mas briyante di e aña, posiblemente visibel sin necesidad di uza instrumento, si e condicionnan di tempo ta permiti.
Space and Nature Aruba Foundation ta entusiasma pa anuncia cu Cometa C/2023 A3 lo ta mas visibel despues cu solo baha, si shelo ta limpi na horizonte. E fecha optimo pa wak e lo ta rond di 15 di october. E cometa lo ta na un haltura abou, riba horizonte west, desde ora di atardi te den anochi. Den e dianan despues di 15 di october, e briyo di e cometa lo ta disminui poco poco, por eso ta importante pa no perde tempo y wak e lo mas trempan posibel.
E Cometa A3 no ta solamente un fenomeno unico, sino tambe historico, pasobra e no lo bolbe pasa den nos sistema solar pa otro 80,000 aña. Esaki ta haci di e un oportunidad di un bes den bida. E cometa lo por tin un rabo resplandeciente di stof y ijs, cu posibilidad di dos rabo —un blanco y un blauw— iluminando e shelo di nochi.
Con por wak e experiencia cosmico aki na su miho forma?
Busca un luga unda bo por haya un bista cla di horizonte di west.
Evita luz di ciudad of zona di hotel; e lugarnan mas scur lo mehora e visibilidad.
Uza binocular of telescopio pa mira e cometa mas cerca, aunke e lo por ta visibel sin instrumento.
Pa mas informacion: Pa haya mas detaye di e evento celestial aki, incluyendo updates en vivo y conseho pa haci observacion na Aruba, bishita e facebook page: spacenaturearuba.
Laga nos sali cu nos binocular of un stoel di lama, y bini hunto como comunidad pa disfruta di e beyesa celestial di e anochi. Uni na nos pa celebra este evento cosmico y espectacular!
