Fraccion di MEP ta urgi Prome Minister pa interveni den crisis di Hospital

Fraccion di MEP ta urgi Prome Minister pa interveni den crisis di Hospital

Evelyn Wever-Croes:

ORANJESTAD (AAN): Durante e conferencia di prensa dilanti di Horacio Oduber Hospital, lider di Fraccion di MEP Evelyn Wever-Croes a urgi Prome Minister Mike Eman pa interveni den e crisis di Hospital. E fraccion ta pidi cu Prome Minister instrui Minister di Salud Publico Marvin Wyatt-Ras pa aplica articulo 2a di e ley di AZV, cu, segun Wever-Croes, ta ofrece un solucion pa atende e situacion cu urgencia.

   Wever-Croes a remarca cu, durante su liderazgo como Prome Minister, Gabinete Wever-Croes I y II a pone proteccion di bida di ciudadano na prome luga. Durante pandemia, tanto Gobierno como AZV tabatin recursonan limita. Segun e parlamentario, su gabinete a reduci gastonan unda esaki tabata posibel y a reuni e recursonan necesario pa salba bida. El a señala cu Gobierno actual a encontra hopi placa y ta dispone di mas recursonan, entre otro danki na e surplus di Gobierno y di AZV. Pa Wever-Croes, e disponibilidad di e recursonan aki ta haci e falta di un decision hopi mas dificil pa hustifica.

   E lider di fraccion a referi na e advertencia cu Hospital a presenta durante e reunion publico di Parlamento. Segun Wever-Croes, Hospital a indica cu e situacion ta alarmante y cu, si no bin un solucion, bida di pashentnan por keda na riesgo. Den e contexto ey, el a señala cu, segun el a splica, articulo 2a ta duna Minister di Salud Publico autoridad pa duna instruccion na AZV pa atende e problema.

   Wever-Croes a indica cu e minister por sigui cu e investigacionnan cu e ta considera necesario mientras ta traha riba un solucion. Si e resultadonan duna motibo pa tene hende responsabel, e tuma e paso ey. Mientras tanto, segun e parlamentario, e prioridad ta garantisa cu pashentnan sigui ricibi e cuido cu nan mester.

   Segun Wever-Croes, Minister Wyatt-Ras ainda no a aplica articulo 2a y no ta dispuesto pa sigui dialoga cu Hospital. E lider di fraccion a critica e actitud ey y a indica cu Fraccion di MEP lo dirigi su peticion directamente na Prome Minister Mike Eman. E decision ta urgente pa proteha bida di pashentnan y garantisa continuidad di nan cuido.

   “Nos di Fraccion di MEP lo keda insisti y exigi, no na Minister Wyatt-Ras mas pasobra el a demostra cu e no por atende cu e tema aki, sino na Prome Minister Mike Eman. Nos ta urgi Prome Minister pa ora cu e bolbe di tur su biahenan, y tin tur atencion bek pa Aruba, pa pone atencion na esaki y instrui su minister pa aplica articulo 2a di AZV pa bin cu un solucion”, Parlamentario Evelyn Wever-Croes a enfatisa.