Aruba ta e prome y unico pais den Reino Hulandes cu tin un presupuesto aproba pa 2024 y cu tin un surplus

Prome Minister Evelyn Wever-Croes:

ORANJESTAD (AAN):  E siman aki, Presupuesto 2024 di Pais Aruba a wordo aproba pa Parlamento di Aruba. Prome Minister Evelyn Wever-Croes a remarca cu e presupuesto aki a wordo entrega na tempo y a wordo trata tambe na tempo y ta conta cu conseho positivo di entre otro CAft.

            Presupuesto 2024 tin un surplus pa di dos aña consecutivo y tur proyeccion multiannual tambe ta mustra cu e surplus ta keda. Cu e surplus aki, Gobierno ta logra baha e debe cu lo pone Aruba den un situacion financiero mas duradero y mas sostenibel.

            Ministerio di Asuntonan General, Innovacion, Organisacion Gubernamental, Infrastructura y Ordenansa Teritorial ta consisti di 22 departamento. Prome Minister a entrega na Parlamento e metanan pa e aña benidero di tur e 22 departamentonan aki.

            Primordialmente, lo concentra riba e servicio na comunidad y na clientenan y elimina e atrasonan cu tin den algun departamento. Lo concentra mas riba digitalisacion a traves di eGovernment.

            Durante tratamento di Presupuesto 2024 den Parlamento, varios pregunta a wordo ricibi riba e areanan di trabou, especialmente, tawata tin un interes grandi pa Infrastructura particularmente den San Nicolas. Tawata tin varios pregunta tambe riba proyectonan den 2024 no solamente di infrastructura pero tambe di eGovernment y digitalisacion. Pa e proyecto hopi importante aki, a ricibi 14 miyon Euro di Union Europeo.

            Tambe a ricibi hopi pregunta riba e tema di gastonan di personal cu ta un di e categorianan di mas grandi di gasto cu Gobierno tin riba su presupuesto pa cua Gobierno mester logra e norma pa baha gasto di personal pe yega 10% di GDP pa aña 2027. Pa otro aña, esaki ta banda di 10.3% cu ta haci cu facilmente lo logra esaki pa e aña stipula.

            Prome Minister a remarca cu el a ricibi hopi pregunta critico di oposicion durante tratamento di Presupuesto 2024 y ta di lamenta cu mayoria di e preguntanan aki ta basa riba speculacion y manipulacion di informacion.

            Mester remarca, cu un biaha mas, no tawata tin mucho miembro di oposicion presente pa tratamento di Presupuesto 2024. Lider di oposicion di AVP, Parlamentario Mike Eman mes no tawata presente y tawata biahando den un avion priva pa Corsou y no a atende e reunionnan importante di Presupuesto di nos pais.

            “Na final di dia, e presupuesto di cada ministerio a wordo aproba pa Parlamento cu 12 voto na fabor y 7 voto contra. Cu esaki, Aruba tin su presupuesto. Nos ta sumamente agradecido na tur e profesionalnan cu a yuda nos traha e presupuesto aki y tur cu ta yudando nos maneha nos finansas publico especialmente Minister di Finansas Xiomara Maduro. Pabien cu e logro aki un biaha mas. Nos no ta caminda cu nos mester ta ainda, pero nos ta riba e bon caminda si”, Prome Minister a expresa.

            Prome Minister ta extende palabranan di elogio y reconocimento na Parlamento, pa miembronan di Parlamento, Presidente di Parlamento, staff y personal di Parlamento, cu e atende 6 dia di trabou di mainta te anochi laat, pa atende tur e leynan cu mester a pasa. “Cu esaki nos ta pone e paso den bon direccion pa den 2024 tambe, traduci e progreso y bienestar cu nos ta mirando, pa e yega den hogar di cada ciudadano di nos pais”, Prome Minister Evelyn Wever-Croes a enfatisa.