ORANJESTAD (AAN): E anuncio recien di Ursell Arends, Minister di Naturalesa di Aruba,
tocante e ampliacion di e areanan di Ramsar na Aruba a ricibi apreciacion special for di e organizacion local pa conservacion di naturalesa, Aruba Birdlife Conservation.
Como un muestra di gratitud pa e logro significante aki, Greg Peterson, presidente di Aruba Birdlife Conservation, a invita Minister Arends na e Santuario di Parha di Bubali. E santuario aki awor ta parti di e Wetlands di Western y a keda reconoci como un area proteha di Ramsar Wetland.
Durante e bishita aki, Peterson a presenta e Calender di Aruba Birdlife 2024 na Minister Arends, como un gesto di aprecio. E Santuario di Parha di Bubali ta un habitat crucial unda a registra mas cu 200 especie di parha, cu ta e cantidad mas halto na cualkier lugar riba e isla.
Ampliamento di Wetlands: E ampliamento di e wetlands proteha na Aruba ta un paso significante pa biodiversidad. E cuater area nobo di Ramsar (Wetlands di Western, Westpunt, Zuidkust, y Oostpunt) hunto cu e ampliamento di Spaans Lagoen, ta representa un ampliacion historico for di 70 pa un impresionante 14,408 hectare. E ampliamento aki no solamente ta marca un momento importante den conservacion di naturalesa pa Aruba, pero tambe pa Reino.
E areanan aki, rico den biodiversidad, a keda estableci cu e sosten di expertonan for di Universidad di Wageningen y organizashonnan local pa conservacion di naturalesa, bao di e encargo di e minister.
Den e Wetlands di Western, tin cinco saliña esencial pa parhanan migratorio entre Nort y Zuid America. Westpunt y Zuidkust ta inclui varios habitat costal, crecimento di mangel, camponan di yerba di lama, y rifnan di koral, importante pa especienan den peliger di extincion. Oostpunt, mayormente un area marino, ta contene Fontein, e unico fuente substancial, natural y permanente di awa dushi na Aruba.
E desaroyonan aki na Aruba ta enfatisá e importansia di cooperacion internacional y compromiso local pa conservacion di naturalesa, caminda e rol di organizacionnan manera Aruba Birdlife Conservation ta invalorable.
E Convencion di Ramsar: E Convencion di Ramsar, un tratado internacional for di 1975, ta enfoca riba conservacion y uso sostenibel di wetlands di importancia internacional. Casi 90% di e estadonan miembro di e N.U. a firma e tratado aki.
E potret aki saca na e Santuario di Parha di Bubali, Greg Peterson, presidente di Aruba Birdlife Conservation, ta presenta e calender di parha di Aruba 2024 na e Minister di Naturalesa, Ursel Arends, como un muestra di aprecio pa e areanan nobo di Ramsar.
