Aruba ta di luto cu fayecimento di un leyenda musical internacional

Prome Ministro Eman:

ORANJESTAD (AAN): Prome Minister Mike Eman, durante un bishita di trabao na Hulanda, tabata na compania di Señora Shandra John, ora cu a yega e noticia tristo di fayecimento di un di Aruba su leyendanan musical mas grandi, Sr. Robert JeanD'or.

   A sinti e noticia aki aun mas duro, specialmente den presencia di su sobrina Shandra John. Aruba a perde un berdadero leyenda, un talento, un musico, un persona grandi y humilde. Su talento a bay mas leu cu Aruba, na Republica Dominicana, caminda el a presenta hunto cu Los Hijos del Rey, Johnny Ventura, Roberto del Castillo y Juan Luis Guerra pa gran publico y tabata stima pa e nacion.

   Na Aruba esaki no tabata diferente y Robert algun dia atras ainda a yena Convention Center cu alegria y su ritmo unico.

   Mike Eman a conoce Robert personalmente desde chikito, pero mas ainda pa motibo di su contribucion cu e partido politico cual actualmente e Prome Minister ta lidera, esta AVP, ora el a compone e himno di campaña "Ban Cas Bek".  Robert tabatin un bon comprension di con ritmo ta impacta hende, y e tabata tin un gran conocemento di ritmonan Arubano.

   E perdida di Robert ta un duele profundo pa Aruba completo. Prome Minister a convivi den e lucha di Robert durante su enfermedad y nunca a spera cu su partida lo yega asina lihe, pero Dios tabata tin otro plan pa Robert. Awe nos ta conmovi pa su morto y ta desea hopi forsa na e comunidad, su famia y amigonan den e dianan dificil aki.