Aruba su reputacion como destino sigur ta crea oportunidad pa cooperacion cu Peru

Robert Candelaria:

ORANJESTAD (AAN): Secretario General di Ministerio di Asunto General, Robert Candelaria, a califica e encuentro entre Prome Minister Mike Eman y president electo Keiko Fujimori como un momento importante pa Aruba, Peru y Reino Hulandes. E encuentro a tuma luga na Palacio Torre Tagle na Lima.

    Prome Minister Eman y embahador di Reino Hulandes na Peru, Alexander Kofman, a papia cu Fujimori riba diferente tema di interes comun y e posibilidadnan pa estrecha cooperacion.

   Segun Candelaria, presencia di Prome Minister Eman na Peru ta mustra e papel cu Aruba por hunga den representacion di Reino Hulandes den Caribe y America Latina. “Gobierno di Reino a acerca Prome Minister di Aruba pa representa Reino na e momento cu Peru ta presenta su presidenta nobo. Prome Minister y embahador di Reino Hulandes a sinta hunto cu president electo den un encuentro hopi interesante”, Candelaria a declara.

   Durante e combersacion, Fujimori a comparti su vision pa e siguiente cinco aña di gobernacion. Segun Candelaria, e presidenta electo ta consciente di e retonan cu Peru ta enfrenta, pero ta mira tambe oportunidad pa contribui na futuro di su pais.

   Fujimori a participa den diferente eleccion presidencial prome cu logra e responsabilidad di por lidera Peru. Candelaria a indica cu durante e reunion, el a papia den un manera habri riba e temanan cu e ta considera importante pa su gobernacion.

   Siguridad como prioridad: Un di e temanan cu a haya atencion special durante e encuentro tabata siguridad. Segun Candelaria, Peru ta interesa den e experiencia di Reino Hulandes, incluyendo Hulanda y Aruba. “E a pone hopi enfasis riba siguridad. Nan ta mira e ehempelnan den Reino Hulandes, tanto Hulanda como Aruba, como algo interesante”, Candelaria a bisa.

   Siguridad ta di importancia special pa e paisnan cu un economia cu ta depende pa un parti grandi di turismo. E bishitantenan mester por sinti nan mes sigur desde e momento cu nan yega na un destino. Candelaria a indica cu Aruba ta conoci como un di e luganan mas sigur den region. E reputacion aki ta un logro cu mester aprecia y proteha. “Tin biaha nos ta bisa cu Aruba ta e isla mas sigur di nos region, pero nos mester realisa e balor cu esaki tin. Internacionalmente Aruba ta reconoci y admira como un destino sigur cu turista kier bishita”, e Secretario General a declara.

   Comparti experiencia cu otro pais: Segun Candelaria, Aruba no solamente mester aprecia su posicion como destino sigur, sino tambe comparti su conocemento y experiencia cu otro pais cu ta enfrenta reto den e area aki.

   Peru a enfrenta diferente reto di siguridad durante e ultimo aña. Cooperacion cu Aruba, Hulanda y Reino Hulandes por contribui na intercambio di bon practica y desaroyo di solucionnan nobo. “Nos mester aprecia loke nos tin, pero tambe compartie cu otro. Nos por yuda y traha hunto pa fortalece siguridad y e otro areanan di cooperacion cu presidente electo Fujimori a menciona”, Candelaria a bisa. Ademas di siguridad, durante e encuentro a identifica e posibilidadnan pa cooperacion den turismo, maneho di awa, agricultura y desaroyo economico.

   Candelaria a conclui cu e audiencia tabata hopi interesante y cu e relacion entre Aruba y Peru tin potencial pa sigui crece. “Pa Aruba y pa Reino tin hopi oportunidad cu lo presenta nan mes. E encuentro aki ta un bon paso pa sigui fortalece e relacion y traha hunto den areanan cu ta importante pa ambos pais”, Candelaria a declara.