Aruba su evaluacion di Caribbean Financial Action Task Force lo worde trata na mei 2022

ORANJESTAD (AAN): Riba diamars y diaranson Minister Maduro a atende e Reunion Plenario di Caribbean Financial Action Task Force on money laundering CFATF

den cual e Paisnan den Caribe ta bin hunto pa dialoga riba e trabaonan cu ta worde haci pa tene e sistema financiero limpi di labamento di placa y financiamento di terorismo.

   Luna pasa e sistema financiero di Aruba a worde someti na e evaluacion di CFATF y awor Gobierno ta den espera di e resultado di dicho evaluacion. Dentro di poco Aruba lo haya e prome draft di e raport y den e Reunion Plenario di mei 2022, ta spera di trata e raport di e evaluacion di Aruba.

   Desde inicio di CFATF na aña 1990, Aruba tabata semper activo den e organizacion regional aki. Den e ultimo añanan Aruba ta fungi como e representante di e 'Dutch Speaking Countries' den e 'Steering Group' di CFATF.