ORANJESTAD (AAN); Nan a keda contento recien ora cu a anuncia cu luna di October ta e luna pa hendenan di edad halto na Aruba.
Esey sigur ta fenomenal, mirando cu algun organizacion local tin varios evento y charla henter October pa comunidad.
Pero DIARIO a topa Diahuebs cu dos ciudadano nada contento na Servicio Postal. Nan a caba di paga 8 Florin pa haya e papel di Docter pa asina nan bay renoba rijbewijs.
Pues cada uno a paga 8 Florin pa e papel ey.
Awor nan tin di bay na nan Docter di Cas (awe Diabierna) pa paga 50 Florin, pa e profesional medico por yena e formulario pa nan, pone su firma y stempel.
Despues di esey, otro siman nan tin cita na Censo pa asina paga 50 Florin atrobe pa haya nan rijbewijs.
“Mi kier pa boso compronde, cu e miserable pensiun y entrada cu nos como 60+ ta hayando aworaki, hunto cu e prijsnan sky-high di tur producto awendia, cu e 108 Florin aki ta kraak cartera di nos hopi mes,” e ciudadano a indica na DIARIO.
E 108 Florin ey ta un sacrificio grandi cu nan ta haci e luna aki pa por bay renoba rijbewijs. Esey nifica cu e luna aki nan lo cumpra menos fruta, menos beleg, y lo herbe menos weya di boonchi y pinda pa nan come na cas.
“Tanto bal cu ta declara October como luna di hende di edad halto, siendo cu ta sigui kraak nos cu tarifanan absurdo pa rijbewijs.”
