ORANJESTAD (AAN): Meymey di un contagio pa covid-19 por sosode cu bo ta bay percibi holornan hopi desagradabel.
Esey ta un señal cu, segun e specialistanan, ta indica cu bo tin parosmia, un di e secuelanan debi na e contagio cu e variante nobo.
Tur cos ta cuminsa cu e perdida di olfato, cual ta un di e sintomanan menos frecuente den personanan, di acuerdo cu Organizacion Mundial di Salud (OMS). Despues di recupera di e malesa, poco poco lo sinti bek e holornan. Sinembargo, por sosode cu bo lo percibi esakinan como un holor malo, mayoria di nan.
Bo por tin bo dilanti bo cuminda favorito y, ainda asina, percibi un holor malo cu lo laga bo incluso sin gana di come mas.
“Nos a observa cu, desde e pandemia, mas pashent recupera di covid a informa awor di e sintoma aki”, doctor Richard Orlandi, médico y profesor di Universidad di Utah, a bisa den un comunicado.
E specialistanan di e universidad a precisa cu no a documenta detayadamente cua ta e relacion di parosmia cu covid, pues no lo ta un dificultad, manera ta representa otro secuelanan, por ehempel, “e problemanan cardiaco, depresion y e enfermedadnan respiratorio”.
Cuanto e parosmia lo dura?
Un estudio lidera pa Rasheed Ali Rashid, di e departamento di Medicina di Universidad Tikrit (Iraq), a analiza e secuela den 268 pashent, adulto y hobennan, y a haya cu mayoria tabata describi e holornan como awa di pos, webo putri, entre otro holor vies.
Den promedio, esnan cu a participa di e investigacion a percibi e holornan aki durante tres luna y a wak afecta nan bida diario.
“A considera altera e calidad di bida si e pashent a referi disminucion di apetit of di peso corporal of cambio den beis”, asina e resultadonan a mustra.
Tratamento
Como reseña, Universidad di Utah, a bisa cu ainda no sa cua lo ta e tratamento adecua.
No obstante, e profesionalnan di medicina ta recomenda pa esnan cu tin e secuela aki pa percibi holornan di perfume, eucalipto y otro serie di holornan fuerte “pa bolbe train nan cerebro pa ‘recorda’ con pa hole”.
“Unico cos cu nos sa ta cu mayoria di e pashentnan ta recupera nan sentidonan normal di smaak y olfato, pero no tin claridad si hopi di nan lo bolbe na normalidad y den ki medida”, doctor Richard Orlandi a menciona.
Muchanan
Expertonan di Universidad di East Anglia a nota cu hopi mucha di Reino Uni a wordo contagia cu Covid-19 y diripiente nan a stop di come.
“Pa algun mucha, y den particular pa esnan cu ya tabata tin problema cu comida of cu otro condicionnan manera autismo, por ta realmente dificil.
E Universidad hunto cu e organizacion caritativo Fifth Sense a structura un guia cu a presenta na comienso di 2022 pa asina e mayornan por sa con pa anda cu e tema aki y con pa trata e muchanan.
E prome recomendacion ta papia cu nan y prepara cuminda cu “smaak menos fuerte, manera pasta, banana of keshi light, pa wak kico nan por tolera of disfruta”.
Ademas, ta aconseha, cu mescos cu e adultonan, pa inicia c'un entrenamento di e olfato, kiermen, pone e mucha hole desde eucalipto, canela hasta koffie of lavender dos biaha pa dia.
“E muchanan mester percibi holornan cu cual nan ta familiariza y cu no ta provoca parosmia”, segun Philpott.
