Aruba premia cu ‘Internet Archive Hero Award’

ORANJESTAD (AAN): Diaranson anochi na e headquarters di Internet Archive na San Francisco California,

Coleccion Aruba a ricibi e "Internet Archive Hero Award 2024".

   E reconocimento grandi aki Aruba ta ricibi pa e esfuersonan cu e partnernan di Coleccion Aruba a bin ta haci pa digitalisa y haci e herencia cultural di Aruba digitalmente accesibel pa tur cu ta interesa pa haya sa mas di e historia y cultura di Aruba. Pa e ocasion special aki Minister di Cultura señora Xiomara Maduro, hunto cu representantenan di Archivo Nacional Aruba y Biblioteca Nacional Aruba, a tuma e prestigioso premio aki den nomber di Aruba.

   E Internet Archive Hero Award ta worde duna na personanan of organizacionnan cu ta traha pa haci herencia cultural mas accesibel posibel. Ganadonan di pasado ta Biodiversity Heritage Library, scientificonan y huristanan cu ta lucha pa haci informacion mas accesible posibel pa tur hende (universal acces to information) y tambe e agrupacion musical "The Grateful dead" cu a duna su aprobacion pa publico por tin acceso liber na tur nan letra y musica.

   E aña aki e Internet Archive Hero Award a bay pa Pais Aruba su plataforma digital Coleccion Aruba, cu ta un coperacion entre 13 organizacionan cu ta maneha herencia cultural y documental di Aruba, sosteni pa partnernan strategico den esaki. Coleccion Aruba ta disponibel riba e website coleccion.aw, na unda publico por busca den mas di 150 mil item di Aruba su historia y cultura online. Di un archivo skirbi 200 aña pasa, te na un grabacion di e programa musical Showtime den decadanan 80 y 90, tur por worde mira riba coleccion.aw.