Turismo Crucero ta genera 27% mas ingreso den cinco aña
E sector di crucero a registra ingreso record di 4.2 biyon dollar entre 2023 y 2024, un incremento di 27% compara cu cinco aña pasa, cu bishita na 33 teritorio den Caribe.
Business Research & Economic Advisors (BREA) a duna e anuncio aki durante un conferencia di e Asociacion di Cruceronan di Florida y Caribe na isla di Sint Marteen.
BREA a publica resultado di un encuesta entre e periodo aki, cu a investiga con e biaheronan ta consumi, tipo di excursionnan ta preferi y recomendacion di bishita cu nan ta duna.
E dies destinonan cu ta genera mas ingreso durante e periodo aki ta Bahamas (654 miyon dollar), Cozumel, México (483 miyon), Islanan Virgen di America (258 miyon), Republica Dominicana (251 miyon), San Martin (237 miyon), Puerto Rico (201 miyon), Jamaica (197 miyon), Costa Maya, México (187 miyon), Honduras (180 miyon), Islanan Caiman (161 miyon) y Aruba (133 miyon).
Den total, e 33 destino cu a participa na e encuesta a ricibi 29.4 miyon bishitante na nan costa. Cada pasahero a gasta aproximadamente 104.36 dollar, cu ta genera un total di 3.070 miyon dollar.
E gasto medio pa pasahero a crece den 26 di e 31 destino den cinco aña, y 14 di nan a logra un promedio di 100 dollar pa biahero. Ademas, e destinacion aki a ricibi 3.9 miyon bishitante cu ta miembronan di tripulacion, cu segun e estudio aki a gasta 229.5 miyon dollar.
BREA a detaya tambe cu entre 2023 y 2024, e sector a contribui na creacion di 94.027 trabou cu un total di 1.270 miyon dollar na salarionan, representando un aumento di 19% compara cu e encuesta di 2018. Ademas, lineanan di crucero ta gasta 968.3 miyon dollar, un promedio di 29.3 miyon pa destinacion.
