Aruba por yuda Team Aruba cubri gastonan pa FIRST Global Challenge na South Korea

LeAnn Tromp di The STEM Embassy:

Link di GoFundMe ta disponibel riba nan paginanan social  

ORANJESTAD (AAN): Pa di cuater aña consecutivo, The STEM Embassy lo participa na FIRST Global Challenge. Segun LeAnn Tromp di The STEM Embassy, cinco hoben entre 14 y 18 aña lo representa Aruba den e prestigioso competencia internacional di robotica. 

FIRST Global Challenge ta reuni teamnan di mas cu 190 pais, cu ta pone nan talento, creatividad y conocemento den STEM na prueba. E edicion di 2026 lo tuma luga na Incheon, South Korea, di 7 pa 10 di october, bou di e tema mundial “Igniting Innovation.” 

Aña pasa, Team Aruba a logra resultadonan excepcional. E participantenan a gana

medaya di brons pa e Alliance Award y medaya di plata pa e Albert Einstein Award, cu ta e premio mas halto di e competencia y Aruba a termina na di dos luga entre 190 pais participante. 

Pa e edicion di e aña aki, The STEM Embassy kier prepara e hobennan di miho manera posibel y ekipa nan cu tur material y herment necesario, cu e meta di bolbe representa Aruba dignamente y, si ta posibel, logra mas medaya. 

Tromp a splica cu participacion na e competencia internacional di e magnitud aki ta trece gastonan considerabel. FIRST Global lo patrocina e tickets di biahe pa e team, algo cu, segun Tromp, ta representa un aporte importante. Sin embargo, The STEM Embassy ainda mester cubri e registration fee di USD 10.000, cu ta inclui e robot kit, estadia, transporte y cuminda durante e competencia. 

Ademas, tin otro gastonan relaciona cu preparacion di e team, entre otro uniformnan, souvenirnan y otro material necesario pa nan participacion na South Korea. 

Pa yuda cubri e gastonan aki, The STEM Embassy a inicia un campaña di GoFundMe y ta invita comunidad di Aruba pa contribui na preparacion di Team Aruba. E link pa haci donacion por ser haya riba e paginanan oficial di The STEM Embassy na Facebook y Instagram. Tambe tin posibilidad pa haci donacion directamente na nan cuenta bancario. 

The STEM Embassy ta haci un apelacion na comunidad y empresanan local pa sostene e cinco hobennan cu lo representa Aruba y yuda nan yega bon prepara na FIRST Global Challenge na South Korea comienso di luna di october proximo.