Relacionista Publico di ELMAR NV, Audrey Croes:
ORANJESTAD (AAN): Durante e lunanan mas cayente di aña, particularmente entre juni y september, temperatura halto por tin impacto riba nos salud, consumo di awa y coriente, bienestar di nos animalnan y hasta aumenta riesgo di candela. Nos ta drentando den e ultimo luna di e temporada di calor y ta importante pa comunidad ta bon prepara y sa con pa proteha nan mes y esnan rond di nan.
ELMAR NV y WEB Aruba NV ta sigui conscientisa comunidad tocante e temporada di calor y e riesgonan cu por ta relaciona cu esaki.
Relacionista Publico di ELMAR NV, Audrey Croes, a splica cu e motibo principal pa realisa e campañanan aki durante e periodo unda calor ta aumenta, ta pa crea mas conscientisacion tocante e peliger cu temperatura halto por trece. Segun Croes, atencion special mester bay na e gruponan mas vulnerabel den comunidad, entre nan muchanan, adultonan mayor y mascotanan.
El a indica cu e tema di calor extremo ta bira cada biaha mas relevante y cu comunidad ta bira mas consciente di e desaroyonan climatico cu ta tuma luga riba nos isla. Den e cuadro aki, ELMAR y WEB ta enfoca no solamente riba siguridad, cu ta un prioridad pa ambos entidad, sino tambe riba e impacto cu e temporada di calor por tin riba consumo di coriente y awa.
Señora Croes ta haci un yamada na comunidad pa tene cuenta cu e temporada di calor y pa tuma e medidanan necesario pa proteha nan salud y bienestar. Alabes, e ta invita comunidad di Aruba pa bishita e website Temporada di Calor, na unda por haya informacion tocante uzo consciente di awa y coriente, datonan climatico y recomendacionnan practico.
Riba e plataforma, diferente profesional den area di salud, estilo di bida, siguridad y cuido di animal ta comparti tipnan pa yuda comunidad pasa e periodo di juni te september di un manera mas consciente, sigur y comfortabel.
Pa finalisa, Croes a destaca e mensahe central di e campaña di ELMAR y WEB pa e aña aki: “Ban Cuida Curpa.” E mensahe aki ta visibel tambe riba diferente borchi coloca na varios punto rond Aruba, cu e meta di sigui recorda comunidad di importancia di cuida nan mes durante e temporada di calor.
