Alonso Tromp:
ORANJESTAD (AAN): Desde 2022 caba cu Sindicato TOPA a ricibi e conocido Alonso Tromp fungiendo como nan president, a priminti cu ta trece cierto cambionan den e organizacion, rond di cierto desaroyo y cu nan lo bay enfoca riba e parti di enseñanza pa nan mesun miembronan.
E meta di tur esaki ta pa nan forma mas lider den e mundo laboral pa garantiza futuro.
Alonso Tromp a indica den un entrevista cu un biaha mas TOPA ta organizando curso, y e biaha aki a logra di trece Aruba, e conocido Adri Williams kende ta conoci pa su envolvimento den Sindicato ABVO na Curaçao.
E training aki duna door di Williams, ta encera cu Sindicato TOPA tambe ta preparando pa futuro, y ta duna guia na esnan den mundo laboral pa prepara nan mes mas pa cu e cambionan di digitalizacion.
Tur e cursonan aki, combina cu e hecho cu Sindicato TOPA ta dispone di profesionalnan cu hopi experiencia, cu un directiva capaz, nan ta combina cu esnan nobo den e mundo sindical pa asina forma un mezcla perfecto pa ora di negocia y defende e clase trahador.
Awor den e prome tres luna di 2023, directiva di TOPA ta hopi druk ta moviendo riba diferente tereno y tratando asuntonan importante. Alonso Tromp a bisa cu nan a reparti e trabaonan, a forma diferente comision pa handle e asunto na un forma mas eficiente, y nan mesun experto ta haci trabao den comunidad, y haci presencia den cierto trabao tambe. Pasobra hunto ta haci mihor trabao, envez di a djis delega e asuntonan ey pa un solo persona of grupo chikito.
