Aruba One Happy Island Lions Club ta anuncia ganadonan di rifa di Harley Davidson

President Alliyuri Arends:

ORANJESTAD (AAN): Aruba One Happy Island Lions Club (OHIL) ta anuncia oficialmente ganadonan di su rifa exitoso di un Harley Davidson y otro premionan. Esaki, segun presidente di OHIL, señora Alliyuri Arends, tabata un iniciativa, lidera pa Old Skool Bikers, den cooperacion cu Aruba One Happy Island Lions Club y  Aruba Lions Club.

   E meta tabata pa uni organizacionnan, negoshinan local y comunidad henter pa sostene proyectonan di servicio cu tin gran balor pa Aruba. El a expresa su orguyo den e resultado di e iniciativa aki, resaltando cu e exito ta un refleho cla di loke por logra ora comunidad ta traha hunto cu un proposito comun pa sirbi comunidad.

   E ticket number 9568, bendi pa Aruba One Happy Island Lions Club, a resulta e gran ganado. Señor Jarvis Winklaar ta e feliz ganado cu lo ricibi e premio principal, esta un Harley Davidson. Di dos premio ta ticket number 6991, bendi pa Old Skool Bikers, y tercer premio ta ticket number 8539, tambe bendi pa Aruba One Happy Island Lions Club.

   Aruba One Happy Island Lions Club ta felicita tur ganado y alaves ta gradici nan pa e sosten. E club di Lions ta gradici tur negoshi local, comerciantenan, organizacionnan, amigonan di Lions, comunidad, y tambe prensa y tur medio di comunicacion, Aruba Lions Club y Old Skool Bikers, pa e colaboracion y sosten durante e periodo di benta di rifa, uniendo forsa pa logra un meta importante: yuda esnan cu ta yuda.

   Segun President Arends, e resultado di e rifa ta bay mas leu cu solamente un evento pa recuada fondo. El a señala cu, danki na e sosten ricibi, Lions lo por sigui fortifica nan capacidad pa brinda yudanza na esnan den necesidad, contribuyendo na un comunidad mas fuerte, mas uni y yen di compasion.

   Cu e logro aki, Aruba One Happy Island Lions Club ta reafirma un biaha mas su compromiso di sigui sirbi cu proposito, trahando den colaboracion pa crea un impacto duradero y positivo na Aruba.