E lo ta Diadomingo awor
ORANJESTAD (AAN): Fundacion Movemento ta Bida hunto cu Minister di Deporte Gerlien Croes, Fundacion Lotto pa Deporte, Minister Mervin Wyatt-Ras, Directie Ouderenzaken y Giovanni Leocadia, RYG (Reach Your Goals), ta uni forza pa organiza un Olimpiada pa nos adulto mayornan na Aruba.
DIARIO a compronde cu e idea a origina ora INDEBON a invita Fundacion FMTB pa nan Olimpiada pa adulto mayor na Bonaire. Esaki tabata na Juni 2025. Miembronan di directiva a acepta e invitacion aki y a experiencia con grandi e evento aki ta y e idea a nace pa trece esaki na Aruba. Mesora FMTB a bin den accion ora a yega Aruba bek pa cuminsa busca ayudo financiero pa por ehecuta e proyecto aki.
Lotto pa Deporte cu Minister Gerlien Croes a mira mesora un bon oportunidad pa organiza un evento asina pa nos Adultonan Mayor na Aruba. E weganan ta recreativo y 7 grupo di adulto mayor na Aruba lo ta participando pa prome biaha. E gruponan lo participa cu entre 20 a 25 persona den 7 wega total.
E actividad aki ta tuma lugar Diadomingo 12 di April, na Centro Deportivo Betico Croes na Santa Cruz y ta cuminsa 8:00 am y termina 4:00 pm. Tur team tin un otro color di T-shirt, y e 7 gruponan ta: Flor di Aloë (Dakota), Honey Bees (Dakota), Happy Hearts (Santa Cruz), Rise and Shine (San Nicolas), Curason Jong (Paradera), Sigui Move 60plus (Noord) y Club Kibrahacha(Paradera). Cu ta un total di 159 participante. Tur grupo ta entusiasma y den training, pasobra e ganador absoluto lo por biaha na Juni pa competi na Bonaire.
Riba e dia di Olimpiada lo tin hopi boluntario cu lo yuda FMTB cu e programa. Na final ora di
entrega di premio y medaya e banda Kibrahacha Boyz lo trece ambiente. E prome Olimpiada pa nos Adulto Mayor ta dedica na Señora Edna Maduro, como e ateleta cu a trece e prome medaya di oro pa pais Aruba den aña 1993 na wega CAC (Puerto Rico).
Fundacion Movemento ta Bida ta invita tur adulto mayor, famia y amigonan di tur e participantenan di e gruponan ariba menciona, pa bay apoya nos adulto mayor riba Diadomingo 12 di April na Centro Deportivo Betico Croes (Santa Cruz). Bar y cushina lo ta bon surti y den man di Believe in Yourself. Entrada ta gratis.
