Aruba na di dos lugar entre 4  destinacion cu a mira grado halto di recuperacion na 2021

Segun cifranan di CTO: *Compara cu 2020 pa loke ta turistanan “stay over”

ORANJESTAD (AAN) – CEO di Oficina di Turismo di Aruba, señora Ronella Croes, den conferencia di prensa di Gobierno, Diaranzon, a splica cu e tendencia pa e cantidad di bishitantenan aumenta na Februari un tiki mas di e proyeccion conservativo, ta sigui tambe na Maart.

Pero e pregunta ta, si ya caba por yega na e proyeccion inicial pa e luna di Maart, y sali for di e ciclo di escenarionan conservativo, basicamente, y acelera e recuperacion.

Ronella Croes a referi tambe na e eliminacion di medidanan y esaki tambe otro punto clave cu lo bay den comunicacion internacional tambe, di parti di ATA.

“Nos ta wak diferente pais, internacionalmente, cu ta sali dilanti y ta papia di elimina medidanan di covid, y esaki ta algo cu nos, naturalmente lo subraya, sperando pa stimula basicamente, bishitanan pa Aruba”, Ronella Croes a menciona.

Bayendo bek un momento na aña 2021, CEO di ATA a acentua, cu semper ta importante pa wak con Aruba su mesun desaroyo ta, compara cu otronan. Den e contexto aki con Aruba su desaroyo tabata compara cu otronan den Caribe.

Pa esaki, ATA ta uza cifranan di Organizacion di Turismo den Caribe (Caribbean Tourism Organization) y por mira cu tin cuater destinacion cu a sa di mira e recuperacion mas halto na 2021, compara cu 2020, ora cu ta trata di turismo “stay over”, y Aruba ta un di nan.

“Nos por mira cu Aruba ta den pool hunto cu Republica Dominicana, Puerto Rico y Sint Maarten. Nos ta mira cu Sint Maarten ta mustra un grado di crecemento di 34% compara cu 2020, y Aruba ta na di dos lugar den Caribe, cu un grado di crecemento di 19% compara cu 2020, sigui pa Republica Dominicana y, consecuentemente, Puerto Rico ”, CEO di ATA a señala.

Ronella Croes a haya importante pa, den e contexto aki, menciona algun aspecto adicional: Sint Maarten kizas tin efecto ainda di e impacto di e horcan cu tabata tin tambe. Esaki ta haci cu tabata tin mas caida apart di covid-19, y pues nan adelanto ta kizas un tiki mas halto.

“Esaki ta un teoria, pero kizas e ta un splicacion pa e resultado eynan tambe. Pero tambe mester acentua e hecho cu, entre otro, Republica Dominicana no tabata tin un maneho di entrada, cu ta exigi test y otro rekisitonan for di viaheronan”, CEO di ATA a declara.

Kiermen cu Republica Dominicana tabata tin un maneho hopi habri durante e pandemia y esey a yuda nan tambe, yega na e resultado cu nan a mira na 2021.

“Y por ultimo, Puerto Rico. Mester corda cu nos ta papiando akinan di teritorio domestico di Merca, pues loke ta aplicable na un Mericano, ora nan ta biaha dentro di su pais, ta aplicable tambe como maneho di kico ta rekeri di dje, ora e ta bay Puerto Rico. Pues, no mester test, entre otro, y esey ta un adelanto y bentaha pa Puerto Rico”, Ronella Croes a remarca, agregado: “No obstante e mensahe cu nos a hiba, cu tin diferente rekisito y cu a traha sigur pa Aruba, bo ta mira cu el a traha tambe pa loke ta trata e recuperacion cu nos a mira na 2021”.

Croes a agrega cu esaki ta algo cu ta bon pa subraya y cu e ta kere cu ta resultado di diferente factor, y el a bisa cu di parti di Oficina di Turismo, mirando tur e oportunidadnan aña pasa, nan a pusha extra tambe, por ehemplo den e mercado Mericano sigur, y otro mercadonan tambe, entre otro, e mercado Hulandes, unda cu tabata tin oportunidadnan, mirando cu otro paisnan tabata cera, basicamente.