Aruba Muscle Car and Classic Club preparando pa celebracion grandi di 20 aña di existencia

ORANJESTAD (AAN): Recientemente Aruba Muscle Car and Classic Club na Urataka Center a tene un reunion general pa tur miembro,

relaciona cu e hecho cu dia 25 di Januari 2025 e club ta celebra 20 aña di existencia.

“E ta un fecha hopi importante y hunto cu tur e miembronan nos ta pensando riba un uniform nobo y pesey e idea ta tambe pa tene un actividad grandi riba e fecha, pa tur miembro por celebra e dia special aki”, segun Danny Maduro, miembro di e comision di Aruba Muscle Car and Classic Club.

El a indica cu 20 aña di berdad ta algo pa celebra, mirando cu no tin mucho Car Club ta wanta asina tanto tempo.

”Nos ta e Car Club mas grandi di Aruba y sigur pa nos ta algo special pa celebra e dia aki”, segun Maduro.

El a splica cu diferente Car Club a wordo invita for di awor caba, pa celebra hunto cu Aruba Muscle Car and Classic Club.

Pa luna di November y December e club no lo tene actividad  mirando tambe e tempo di yobida, pero e intencion ta pa dia 25 di Januari bira un celebracion hopi grandi.