Aruba Marriott Resort den proceso pa remodela algun restaurant

ORANJESTAD (AAN): Diabierna anochi durante un brindis special cu gerencia di Aruba Marriott Resort ofreci na medianan di Aruba,

relaciona cu celebracion di ‘Dia di Prensa’, a introduci nan Complex Executive Chef, kende ta Andrés E. Dávila kende ta bay empuha e experiencia culinario na e resort aki den un direccion aun mihor.

   E anochi aki, gerente general Raoul Lemmerling kende pa mas di un aña caba ta Complex General Manager di Aruba Marriott Resort, a informa prensa cu nan tambe ta contento di e forma acelera cu turismo ta recuperando riba e isla.  El a bisa cu ya caba e resortnan ta ‘bek na tur cos di costumber’ manera antes, y aki el a menciona na forma chistoso cu atrobe bo ta haya turistanan ta pleita pa haya e mihor asiento ‘lounge chair’ banda di piscina, of e mihor palapa mas cerca di lama.

   Den un tono serio el a bisa cu tin remodelacion den preparacion pa trece cambio y modernismo den e.o. La Vista Restaurant.  El a bisa tambe cu muy pronto nan lo bin bek cu e Brunch semanal na La Vista.   Nan tin Brunch ainda eynan, pero e no ta algo di tur siman.

   El a splica tambe cu lo bay haci un renobacion completo na nan popular restaurant cerca di beach, esta ‘Atardi’ cu lo bay beneficia hopi di un facelift bon mereci.

   Y awor cu nan tin un Chef nobo, sigur tur esaki lo bay combina cu un revision di tur nan Menu pa asina catapulta e Resort den un epoca unda lo bay satisface e demanda di e turistanan cu ta keda exigi lo mihor.

   DIARIO a tuma nota cu e personal di La Vista ta totalmente yen di motivacion, y cu nan profesionalismo ta briya den tur skina, caminda nan ta pone e huesped na prome lugar, y hasta ta ‘pronostica’ di antemano tur necesidad cu cada huesped tin mester di dje ora di cena.  Felicitacion na e personal!