Aruba Marriott Resort a organiza un Chef’s Table na honor di prensa local

Chef Andrés Dávila a briya e anochi ey

ORANJESTAD (AAN): Riba Diabierna anochi, Aruba Marriott Resort a tene un evento exclusivo como gradicimento na prensa local.  Y nan a haci esaki den forma di un Cocktail Hour, sigui pa un Cena unico cu areglo di Biña, pa conmemora Dia di Prensa.

   Alavez, e tabata un momento unico pa duna bon bini na e Complex Executive Chef nobo, esta Andrés Dávila kende a yega 2 luna pasa for di Ecuador.

   La Vista Restaurant a worde transforma den un comedor di magia, unda den e estilo di Chef’s Table, tur media cu nan invitadonan a haya chens di admira, analiza, y disfruta di loke e Chef nobo ta presenta su mes, esta platonan culinario unico cu a worde traha na man y di e forma aki a hiba tur hende rond mundo cu su forma di cushina.

   Na entrada, tur invitado a ricibi un bebida di bon bini, esta un ‘Moringa Sour’, cu ta un creacion di e Bartender di La Vista mes, y cu a worde hopi bon ricibi!  E ta contene ademas di moringa, tambe tiki tamarijn, Papiamento Rum, y mas cu ta haci e bebida uno hopi agradable pa refresca curpa for di un calor inmenso cu tabatin riba Diabierna.  Ademas di esaki, La Vista tin un “beverage printer” cu a imprimi un mensahe special pa tur periodista presente riba e bebida di Moringa Sour.

   Despues di esey, cada invitado a haya un paspoort den man, y a worde escolta pa e area di comedor.  Riba e paspoort aki, riba cada pagina bo ta haya informacion di tur plato cu Chef Dávila lo presenta, y tambe informacion di areglo di e top biñanan for di rond mundo.  DIARIO a tuma nota cu e anochi aki, hasta invitadonan cu normalmente no ta bebe Biña, a keda comenta con fabuloso cada uno tabata smaak.

   Gerente general Raoul Lemmerling a indica, cu e showcase aki di cuminda sumamente delicioso, bunita presenta, y memorable di Chef Dávila, sigur e ehecutivonan di Aruba Marriott Resort a haya chens di estrecha lazonan duradero cu prensa local y di bisa danki pa cobertura cu e compleho di Aruba Marriott Resort a bin ta ricibi durante aña.

   Ta bisto cu Aruba Marriott Resort tin confianza den economia di Aruba, ta invirtiendo p’asina sigui desaroya e producto turístico di Aruba en general, y di nan compleho di resortnan en particular.  Mas potret por wordo mira na Pagina 24.

   E profesionalismo di e personal na La Vista ta loke a resalta grandemente, y pesey DIARIO a felicita Kristofer Bremström tambe, kende ta Complex Director di Food & Beverage.

   Na final, Carolina Voullieme kende ta director di Sales & Marketing, a gradici tur hende pa nan presencia.  Claro, cu tur e trahadornan tambe a sali pa asina nan a ricibi un aplauso gigantesco di tur invitado.  Esey tabata un indicacion claro cu e tabata un anochi hopi fenomenal y exitoso.

   DIARIO ta convenci, cu Chef Dávila ta bay trece un aire fresco den Aruba Marriott Resort, y riba su cara por a mira e satisfaccion di e anochi exitoso.  DIARIO ta gradici Noémi Tromp, Stephanie Acosta, y sirbidornan Ivan y Elly pa e bon servicio.