Aruba lo ricibi 9 calls den luna di October

Minister Dangui Oduber -  ORANJESTAD (AAN)- E cantidad di barconan crusero ta aumenta gradualmente y den luna di October 2021 Aruba lo ricibi 9 calls cu ta un aumento gradual compara cu luna di September cu tabata tin solamente 6 calls.

            Minister Oduber ta recorda pueblo cu ta apenas na juni 2021 Aruba a ricibi su promer linea crusero desde maart 2020. Pa mas cu 1 aña y 3 luna Aruba no a ricibi ningun barco crusero. Gobierno ta haci hopi esfuerso pa cruseronan por ta bek na Aruba.

            Den October lo ta yegando barconan crusero for di Celebrity Cruises, Royal Caribbean Cruise lines y Carnival Cruise Lines.

            Minister Oduber a señala cu pa e aña aki ainda falta 18 calls. Schedule di barco crusero den luna di October 2021 a conoce un aumenta di 3 calls.

            Minister Oduber ta splica cu Ministerio di Turismo, APA y ATA ta keda traha na un manera pro-activo pa sigui acerca mas linea crusero pa bin Aruba, tambe pa splica nan kico e situacion ta na Aruba.      Na mes momento lo comparti tambe e protocolnan cu lineanan crusero lo mester sigui.

Aruba tabata e prome destinacion pa e cruseronan.

            Cu esaki Aruba ta continua su recuperacion di nos turismo crusero. Sigur esaki ta crea oportunidadnan pa nos economia, pa e cuponan di trabou, pa tour operators, pa taxistanan, pa restaurantnan y tiendanan di retail.

            Minister Dangui Oduber ta menciona cu mescos tabata e caso cu e bishitantenan stayovers, turismo crusero lo mira un crecemento gradualmente segun proyeccion di APA.