Aruba lo bay tin otro siman un ‘Barbie Weekend’ yena cu actividad na Gloria

Yegada di e pelicula tan spera...

ORANJESTAD (AAN): E pelicula tan spera di “Barbie” ta rumbo pa Aruba!  Y specialmente den cuadro di esaki, TheMovies @ Gloria ta preparando diferente actividad cu lo bay trece amantenan di Barbie aun mas den e ambiente unico aki.

   Esey ta loke Devin de Veer di mercadeo na Gloria Entertainment Center a confirma durante un conferencia di prensa.  E pelicula ‘Barbie’ mes ta hayando acogida hopi positivo, y su premiere mes lo ta otro siman.  Pesey mes, gerencia di Gloria a opta pa haci cosnan leuk, y a tuma decision e ora pa organiza henter un weekend di actividad cu estreno di e pelicula.

   Barbie lo cuminza pasa riba pantaya grandi riba Diahuebs 20 di Juli 2023.  Pesey mes riba Diahuebs, Diasabra y Diadomingo lo bay tin diferente actividad.

   Riba Diahuebs: E prome actividad ta Diahuebs y ta bira “Barbie Premiere VIP Event” cu ta un evento pa 18 aña bay ariba, cuminzando 7:00 pm na e patio abao di P.F. Chang’s Restaurant unda lo tin 1 ora di cocktail party, DJ, y diferente cocktails traha cu Grey Goose.  Pa 8:00 pm tur hende lo subi trapi pa The Movies unda lo bay goza di e pelicula den VIP Auditorium pa prome biaha.  Esaki lo ta e prome hendenan cu por bay mira e pelicula di Barbie.

   E evento aki ta solamente 75 Florin, y pa esaki bo ta haya bo welcome drink, bo VIP movie ticket, acceso na e fiesta, y na ultimo lo bo haya un saco di regalo (‘goodie bag’) cu e partnernan di Paper Sisters, Fun Miles, Grey Goose, y Aldo Shoes lo regala cada cliente algo den esaki.  Aldo lo rifa premio pa e Barbie mihor bisti.

   Riba Diasabra: Diasabra lo bay tin un evento cu ta ser yama “Pink High Tea and Movie”.  Luisa Echeverri cu ta encarga cu evento pa The Movies, a splica cu e Pink High Tea aki ta dirigi pa wordo atendi pa “Mama y nan yiu muher”.  Tin di corda cu e pelicula aki ta pa hobennan di 13+ aña di edad (Barbie tin un PG-13 rating).

   Pa e ‘Pink High Tea and Movie’ event, lo bay cobra 45 Florin y e ta inclui e High Tea teni na Sizzle, cu ta inclui pasabocanan color roos, sigui pa un comfort movie banda di 4’or.  Corda cu e pelicula ta 13 aña pariba, pues pa e evento di High Tea tambe, e exigencia aki ta conta.

   Riba Diadomingo: Pa finaliza e fin di siman di evento rond di Barbie Weekend, tanto Devin de Veer como Luisa Echeverri a indica cu nan lo bay tin e “World of Barbie Bazar”, unda lo habri porta pa negoshinan chikito cu ta pertenece na muhernan, y na e Bazar nan lo haya un booth caminda nan por bay pa ofrece kizas prenda, bela, obra di man of demas productonan di man, unda e empresarionan femenino tin chens di estrena tur loke nan tin pa ofrece.  De Veer a splica cu esaki lo bay ta un chens unda nan kier empuha pa empresario- y comerciantenan femenino chikito pa nan haya un chens pa comparti tur loke nan tin.

   Echeverri a subraya cu e evento aki ta pa sostene muhernan cu ta drentando den zapato di bira empresario, of cu a crea un marca cu ta crea y pertenece na e ser femenino.  E bazar aki lo ta na di 2ndo piso di Gloria den e lobby grandi di The Movies.

   E empresarionan cu kier participa, tin di manda un email na: This email address is being protected from spambots. You need JavaScript enabled to view it. y e tin un costo di 25 Florin, y boothnan lo ta hopi limita.  Pues esnan cu reserva prome lo haya espacio.

   De Veer a indica cu Gloria a uni pa e evento aki cu Aldo Shoes cu tin nan linea di zapatonan Barbie cu lo wordo estrena e weekend ey tambe na Aruba.

   Joanette Vrutaal di Aldo Shoes a confirma cu e coleccion di “Barbie by Aldo” a yega Aruba, cu ta super pink, super fab, y super blingy.  Nan lo lanza esaki riba Diabierna 21 di Juli na e tienda na Aldo Betico Croes di 4’or pa 7’or, y Diasabra na e tienda na Aldo Paseo Herencia di 4’or pa 7’or tambe.  Tin di yama nan di antemano na telefon pa bo ta riba e lista, y pa haya chens pa cumpra e coleccion unico aki cu ta sold-out rond di mundo.

   Mirla Passchier kende ta Area Manager di Fun Miles tambe ta contento di ta participando den e Weekend di Barbie, unda miembronan por uza nan puntonan tambe, y ta sigur cu e evento lo ta exitoso.

   Julissa Ras kende ta co-doño di Paper Sisters ta contento di ta participa den Weekend di Barbie, specialmente Diahuebs cu lo bay ta all-pink, cu pink cocktails, pink photobooth, cu varios premio di Paper Sisters.