Tisa LaSorte, presidente di AHATA:
ORANJESTAD (AAN) – Tisa LaSorte, presidente di Aruba Hotel and Tourism Association (AHATA), a declara den entrevista cu DIARIO, cu su recomendacion tocante a problema di vet cu ta obstrui e sistema di riolering, ademas di e dos proyectonan cu ta pendiente ainda, ta pa haci control.
LaSorte a subraya tambe cu no ta solamente vet pero awa di pool tambe mester evita pa e bay den riolering pasobra e tin chlorine y esaki tambe ta daña e sistema y su proceso.
Pues, e mesun carta cu a wordo manda pa AHATA y cu nan a manda pa nan miembronan, laga un hende bay cana den e area concerni, y entregue na cada un di e restaurantnan, na tur hende cu ta opera den e area aki, y e ora por ta sigur cu tur hende a ricibi’e. “Y e di dos parti, ta haci control. Bo mester di un task force pa haci control. Un di e problemanan cu nos tin na Aruba ta cu no tin suficiente handhaving.
E unico manera cu tur hende ta haci loke debe ser, ta si nan sa cu tin un peliger. Ta lastima cu ta asina. Si nos ta mira cu enberdad tin lugarnan cu no tin ‘grease trap’ of cu tin hende cu ta basha sushi den e riolering, cual mi no por compronde pakico tin hende ta haci algo asina, pero cu obviamente ta pasando, mester haci control, mester ‘handhaving’. Tin otro aspecto, y esey ta cu awa di pool tampoco mester drenta den riolering pasobra e tin chlorine den dje, y esaki tambe ta caba cu e sistema y e proceso. Nos tin hopi cos asina, cu ta cuminza cu educa, informa, y e ora ey mester haci un control pa wak ken ta cumpliendo y ken no ta cumpli, y esnan cu no ta cumpli mester sigura cu nan ta coregi loke nan ta haciendo”, Tisa LaSorte a subraya.
E dama a comenta cu AHATA lo ta contento si autoridad concerni lanta un task force, na cual nan lo ta dispuesto pa coopera pa haci control pasobra e ta na bienestar di nos pais.
