Aruba Lions Club a contribui na un bunita actividad di Special Olympics Aruba

ORANJESTAD (AAN): Na cuminsamento di e luna di november Aruba Lions Club hunto cu su Leo Club

a participa den un actividad di e organisacion Special Olympics Aruba caminda por a sigui diferente charla pa biba saludabel y tambe despues hasi algun actividad pa examina e atletanan manera cu test pa bista etc.

            Un programa cu participacion di algun autoridadnan internacional di Special Olympics cu a yega Aruba specialmente pa guia y experencia e proyecto aki hunto cu algun otro pais cu tambe a manda nan miembronan pa asina Aruba por bira ehempel pa otro islanan of paisnan den Caribe por organisa dicho actividad.

            Lions Club Internacional como un di e patrocinadornan principal den Special Olympic, a bira e motibo di participacion di Aruba Lions Club representa e organisacion aki pa medio di su miembronan yudando den e actividad pa un proyecto na comunidad pa tur e muchanan special aki.

Tabata un mainta hopi interesante y bunita cu e "Open Eye Program" pa mira cu e Leo Club di Aruba Lions Club su muchanan tawata hasi e diferente pruebanan di wowo cu e atletanan special, por medio di cartanan pa lesa cu figura riba nan.

            Sigur esaki ta un experencia pa e Leo Club tambe pa tur cu a participa unda for di un edad hoben nan por siña con pa contribui y yuda esnan den comunidad cu mester di esaki.

            Pa e organisacion di Special Olympics Aruba a keda masha agradeci cu e sosten sigur di Aruba Lions Club y mescos pa e club di leonnan esaki ta mas cu un placer pa un biaha mas por contribui na actividadnan caminda cu voluntariamente ta yuda y ta keda sostene proyectonan cu sigur ta na bienestar di comunidad.

            Un palabra di pabien y elogio na tur esnan cu a organisa y participa na e actividad aki.