Anuesca Baly, directora di SKOA:
ORANJESTAD (AAN) – Den un entrevista cu Anuesca Baly, directora di SKOA, el a indica cu e inscripcion a habri pa mayornan cuminza haci aplicacion via di website, what’s app number, of pasa personalmente na SKOA unda esnan cu no por hacie digitalmente, ta wordo asisti pa Joanne.
Baly a elabora tambe tocante e tema di seguro. El a señala cu seguro ta hopi importante pa un alumno cu no ta di Aruba. SKOA no ta cera porta pa ningun alumno. “Nos ta laga tur porta habri, pero mayornan mester cumpli cu e rekisitonan cu ta regarda e alumno. Esey kiermen: seguro valido, su papelnan mester ta na ordo, den e caso aki su passport mester ta na ordo y vigente, cu nos por sa ken ta e alumno cu ta den nos scol, pa e no bira un alumno cu no tin nomber pasobra un bez cu e wordo registra den nos sistema di SAS, nos mester tin tur informacion di e alumno aki, pasobra ta nos deber pa duna tambe e informacion aki na Departamento di Enseñanza y Inspeccion di Enseñanza”, Anuesca Baly a señala.
E di dos parti, el a agrega, ta ora cu e mayornan aplica, SKOA via su departamento di administracion lo trata pa, mas pronto posible, mayornan ta haya un carta cu e alumno ta wordo ubica. Kiermen, mayornan tin e escogencia riba dos scol. “Nos ta trata di cumpli cu e escogencia di e mayornan, pasobra tin mayornan ta bisa cu nan kier pa nan yiu ta na ‘x’scol, pasobra nan ta biba mas cerca, of e opvang di e alumno ta eybanda”, Baly a indica.
El a agrega cu SKOA ta purba di acomoda y ubica e muchanan na e manera miho posible segun e scogencia di a mayor y esey ta algo cu tambe mester tene na cuenta.
“Dus, una bez cu e mayornan haya e carta di ubicacion, si ta bon na Januari tin e parti di registracion ta cuminza. Esey kiermen cu e mayor mester tin tur su papeleo na ordo, y tambe e parti cu tambe ta un rekisito cu ta e aspecto di pago. E pago di scolgeld y di aircogeld, mester ta ful paga”, Anuesca Baly a remarca.
Si esaki no ta completamente paga, e mayor por pidi pa un areglo di pago, cual ta cuminza core for di mei te ora cu scol habri. “Ora cu scol habri e mayor mester bin cu su prueba cu e tin tur cos paga, cu a cumpli cune, pa e alumno por bin na e scol”, e directora di SKOA a reitera.
