Aruba Huis tambe a observa Dia di Betico

ORANJESTAD (AAN): Informacion for di Den Haag ta indica cu Personal di Arubahuis a tene na antesala di Dia di Betico,

un ceremonia pa recorda natalicio di Sr. Gilberto François “Betico” Croes, politico y estadista Arubiano. Minister Plenipotenciario Guillfred Besaril a pone un flor na e busto di Betico Croes.

   Prome cu e acto aki sr. Besaril a tene un discurso den cual e mandatario a para keto riba e dia aki, e significacion y importancia di e persona Betico Croes pa historia di Aruba. E mandatario a bisa cu otro aña sr. Betico Croes na bida lo a haci 85 aña y alavez ta un fecha pa duna balor na e lucha di sr. Betico Croes. ‘Detayenan manera un lucha di tanto aña y toch bo ta un architeco di un proyecto cu na momento cu nos a mira e realisacion di Status Aparte, bo mes no a mire cu bo wowonan.

   E aña aki ta un aña hopi importante pa nos cuminsa prepara, ya cu otro aña na 2023 ta bira cuarenta aña di e Ronde Tafel Conferentie cu a tuma na 1983 den cual definitivamente Aruba a pone su firma hunto cu Hulanda pa nos realisa e Status Aparte cu nos a sa di mira y sa di ta den dje na aña 1986. Pues awe e ta un preambulo na e cuarente aña di e Ronde Tafel Conferentie y e ta un preambulo di bo por bisa e momento di realisacion di un lucha cu ta bale la pena pa bo por para keto na dje y mira kico el a trece pa nos, despues di cuarenta aña di a firma e tratado di Mesa Rondo y 37 aña di Status Aparte pa Aruba.’

   Sr. Besaril a bisa cu riba e dia aki ta recorda un gran homber cu a hiba un lucha cu a sa di pone Aruba te cu unda e isla ta den 37 aña y cu tin un storia su tras cu sr. Besaril ta spera cu e aña aki alcansa na haci e preparacionnan nesesario cu pa otro aña (cu ta un fecha asina importante) por recorda parti grandi di e lucha di sr. Betico Croes. Minister Besaril: ‘Awe nos ta para keto, nos ta pone un flor y nos ta gradici sr. Betico (dfm) pa e herencia cu el a laga pa nos y pa loke el a nifica pa un nacion cu ta chikito den tamaño, pero sigur grandi den curason, Riba e dia aki sr. Betico Croes ta den nos memoria bou di e comunidad Arubiano na Hulanda, como bou nos hendenan na Aruba.’

   E ceremonia a termina cu cantamento di nos himno nacional ‘Aruba Dushi Tera’.  E potretnan pa cortesia di Aruba Huis.