Natalia Schoofs-Delgado, PR: --- ORANJESTAD (AAN): Cu e pandemia di Covid-19, tur sector mundialmente y tambe na Aruba a wordo afecta seriamente.
Esaki a trece hopi reto, pero banda di esaki tambe a crea oportunidadnan.
Relaciona cu esaki, DIARIO tabata tin un entrevista cu e relacionista publico di Aruba Food & Beverage Association (AF&BA), Natalia Schoofs-Delgado.
Den su funcion nobo como vocero di e asociacion el a trece dilanti varios topico importante riba cual e ta elabora ampliamente.
Mester menciona cu Natalia tin estudio den Administracion di Empresanan Hotelero y Turistico y e tin 25 aña den sector turistico. For di December 2021, e ta ocupando e puesto di relacionista publico di AF&BA.
Den luna di januari 2022, e asociacion tambe a instala nan presidente nobo den persona di Carolina Merryweather ken tin un estudio den Hospitality Management & Tourism como tambe den Business Administration y cu mas di 15 aña di experiencia den e sector di restaurantnan na Aruba.
Cu caranan fresco, AF&BA ta cla ta cuminsa un aña yen di entusiasmo y hopi trabao.
Relaciona cu esaki e vocero a duna di conoce cu na e momento aki, e obhetivo principal di e asociacion ta pa uni e industria na Aruba pa medio di un organisacion central.
Nan strategia lo ta uno basa den e crecimento, a bisa, cu e ingreso di mas miembronan pa asina por logra nan meta, cual ta e unificacion, y alcansa hopi mas logro pa e industria.
"Nos ta creando varios strategia na e momento aki. Nos ta trahando constantemente pa por ofrece mas beneficionan na e miembronan, principalmente den e epoca aki di hopi reto", e vocero di AF&BA a señala.
Lo introduci un plan educacional hopi yamativo cu un portfolio di beneficionan pa e sector, por ehempel.
STRATEGIA
E PR di AF&BA a revela cu e strategia mas eficas cu a wordo implementa pa atende cu e retonan, di entre otro e pandemia, ta mantene nan mes uni y den comunicacion cu Gobierno y cu e entidadnan concerni den loke ta e toma di decisionnan, di e protocolnan.
AF&BA ta trahando hopi proactivo participando den tur comision y ekiponan di trabao, no solamente pa expresa nan preocupacionnan, pero tambe pa aporta solucionnan, Schoofs- Delgado a declara.
