ORANJESTAD (AAN) – Minister Xiomara Maduro, Titular di Finanzas y Cultura, a hiba palabra den e conferencia di prensa di gobierno, Diaranzon di e siman aki,
den presencia di e Comision Fiestanan Nacional, den cuadro di e celebracion di Dia di Betico, Diamars 25 di Januari, otro siman.
Minister Xiomara Maduro a expresa cu Betico a bisa pueblo palabranan bunita y elocuente y su lucha ta testigo di esey, pero sigur awe mas cu nunca un di su refrannan ta resona den e mente y curazon di pueblo di Aruba.
Sigur un di e frasenan aki ta ‘Un pueblo uni hamas por ser venci’, cu Betico a haci inmortal y cu mas cu nunca ta conta pa Aruba” segun e mandatario. “E union cu nos tin mester ta mustra cu comparti cu otro ta e forza cu ta duna nos pa nos saca nos pais dilanti. Y cu e tema aki mi kier haci un invitacion na pueblo di Aruba pa hunto nos bay conmemora Betico, como un persona, un simpel ciudadano di Pais Aruba, pero cu den su trayectoria como maestro di scol, y despues como politico, como lider di Partido MEP y tambe como esun cu a logra Status Apart, pa Pais Aruba, pa nos celebra su bida, pa celebra su logronan, pa nos reflexiona tambe riba kico tur el a pasa den dje, pa nos tambe sinti nos mes inspira pa e lucha cu el a hiba pa locual el a haci tambe pa por uni un pueblo, pasobra na final di dia ora bo repasa su historia di bida pero tambe tur locual el a haci na Aruba, bo ta ripara cu locual tabata cardinal pa e por a logra tabata e hecho cu e por a uni un pais. Y e union ey, tabata e forza cu awe ta brinda nos e Pais Aruba. E Aruba cu nos conoce”, Minister Xiomara Maduro a expresa.
E dignatario a informa cu Dialuna 24, otro siman, ta bay tin e Manifestacion Cultural. E ta bay ta virtual pasobra tur hende sa e situacion di covid-19 cu nos pais ta den dje, pero asina mes den e calor y union di cada hogar, por sigui e programacion virtual aki.
E mandatario a bisa cu e artistanan local, y Betico mes como un artista cu a forma y lanta Grupo di Betico, cu ta gusta e union cu por trece hunto y e alegria pa locual ta e parti di musica, mas cu claro e Manifestacion Cultural aki, ta na su honor.
E mandatario a extende un invitacion cordial na henter pueblo di Aruba, pa sigui e manifestacion cultural aki, cu ta cuminza pa 8 or di anochi te 9.30 y ta wordo pasa den tur canal di television local. E dignatario a agrega cu logicamente tin e ceremonia protocolar, Diamars 25 mainta, di 9’or pa 10.30’ or, y e ta tuma lugar na Plaza Libertador Gilberto Francois Betico Croes.
Minister Maduro a indica cu aunke e biaha aki ta habri pa mas invitado, debi na e situacion e publico no por tin e celebracion, manera normalmente pueblo di Aruba ta custumbra cune. Pero mescos cu aña pasa e acto protocolar ta pa invitadonan, pero e lo wordo transmiti tambe y lo por scucha e discurso di Minister Presidente, kende e dia aki lo hiba un reflexion pa cu e Dia di Betico. Asina minister Xiomara Maduro a trece dilanti.
