“Aruba Dushi Tera” como bos di identidad y union

Aruba ta celebra 50 aña di su Himno Nacional:

ORANJESTAD (AAN): Na 2026, Aruba ta conmemora 50 aña di su Himno Nacional, “Aruba Dushi Tera”, adopta oficialmente riba 18 di maart 1976, mesun dia cu nos bandera nacional. E adopcion di e himno y bandera a marca un momento decisivo den e afirmacion di identidad cultural y nacional di Aruba.

Anteriormente, como cu Aruba tabata forma parti di Antias Hulandes, nos tabata uza e Himno di Antias Hulandes. E deseo pa un himno propio a yega mas fuerte den e añanan 1950, ora cu dos musiconan hopi conoci na Aruba, Juan Chabaya “Padu” Lampe (letra) y Rufo Wever (musica), a compone un wals cu un melodia tipico di nos isla den aña 1951–1952. Nan proposito tabata pa crea un cantica cu ta expresa amor pa patria y lanta sentimento patriotico den cada Arubiano.

E grupo “De Trupialen”, bou direccion di Frere Alexius, a hinca “Aruba Dushi Tera” den nan repertorio, lo cual a aumenta su popularidad. Na 1954, Radio Kelkboom a graba e cantica riba un disco 78 r.p.m., canta pa De Trupialen y acompaña riba piano pa Padu Lampe, haciendo e conoci riba tur isla. Desde e momento ey, e cancion tabata resona na e ocasionnan importante y e ceremonianan oficial.

Dia 25 di februari 1976, Gobierno Insular a instala un comision pa recomenda oficialmente “Aruba Dushi Tera” como Himno Nacional den ritmo di wals. E comision a propone pa añadi un ultimo couplet, inspira pa Hubert “Lio” Booi, cu e frase: “cu Dios por guia y conserva su amor pa libertad”, resaltando e cordialidad di nos pueblo y su balor pa libertad.

Riba 16 di maart 1976 a aproba oficialmente “Aruba Dushi Tera” como Himno Nacional. Dos dia despues, 18 di maart 1976, durante un manifestacion oficial den Stadion di Wilhelmina na Dakota (awor Stadion Guillermo Prospero Trinidad), e himno a ser proclama oficialmente. Pa di prome biaha e himno a resona como himno oficial, canta pa e coro di Maybeline Arends Croes, cu acompañamento di Orkesta Filharmonico di Aruba bou di direccion di Hesus Maria “Joy” Kock.

E fecha 18 di maart tambe ta conecta cu e Mesa Rondo na Hulanda di 1948, ora cu pa prome biaha un mocion a ser entrega na Reina Juliana pa boga pa autodeterminacion di e pueblo Arubano, lidera pa Shon A. Eman y firma pa 2147 Arubiano. P’esey, 18 di maart a bira Dia di Himno y Bandera, un dia nacional di Aruba.

Significado cultural y linguistico

Un di e elemento mas importante di e himno nacional ta cu e ta skirbi na Papiamento, idioma materno di mayoria Arubiano. Esaki a fortalece e posicion di Papiamento como pilar di identidad nacional y cultural, y a duna e himno un caracter autentico y profundamente local.

“Aruba Dushi Tera” ta expresa:

• amor pa e isla y su naturalesa,
  • orguyo di identidad cultural,
  • union entre diferente origen,
  • y un compromiso moral pa cuida e pais.

50 aña di bos nacional

Despues di 50 aña, e himno nacional a acompaña Aruba den e momentonan di orguyo, desafio y celebracion: desde e ceremonianan oficial te evento deportivo y cultural. E aniversario di oro ta invita pa reflexiona riba e significado di e letra y e responsabilidad cu ta bin cu amor pa patria.

E celebracion di 50 aña di “Aruba Dushi Tera” no ta solamente un homenahe na pasado, pero un invitacion pa pasa e balor di respet, union y responsabilidad pa e futuro generacionnan.