Aruba cu problemanan serio di accesibilidad pa e grandinan y esnan cu discapacidad

ORANJESTAD (AAN):  Riba e potretnan adhunto por constata algun situacion cu tin na Aruba y meymey di siglo 21 ta increibel cu ta sigui sosode.

Un pais mester por conta cu un infrastructura adecua pa tanto e personanan cu un discapacidad como pa e adultonan mayor. Pero por mira claramente cu na Aruba hopi lugar no ta tene cuenta cu esaki.

Riba un potret por mira con e accesibilidad pa e esnan riba rolstul den areanan turistico y publico ta laga hopi di desea. Te hasta tin palonan di borchi meymey di e 'walkway cual ta bira hopi reduci pa un persona cu mester haci uzo di e pida acera ey.

E subidanan, esakinan tambe ta mucho halto na hopi caminda y esaki sigur ta un peliger pa un adulto mayor of un persona cu algun discapacidad.

Por mira tambe cu ta para autonan ariba acera y esaki ta stroba e paso. Esaki sigur no por!

Mester tin consideracion cu e tipo di situacionnan aki cual sigur ta degrada Aruba hopi mes. Por ehempel, ora c'un turista ta bishita Aruba, esaki ta algun di e cosnan cu nan ta constata y cu ta critica mesora.

Tin biaha tambe ta mira con ta blokia e caminda cu piedra pa autonan no bay parkeer. Esaki ta otro manera di stroba e accesibilidad pa e peatonnan.

Algo urgente mester wordo haci pa resolve e problema aki cu ta uno primordial.

Na algun pais, por ehempel, a cuminsa aplica e ley di accesibilidad pa personanan cu discapacidad, cual ta exigi pa tur  departamento, edificacion, empresa constructor y transporte publico, pa asina crea infraestructuranan pa e personanan aki, cu e obhetivo di por  wordo traslada y accede na cualkier lugar sin ningun impedimento.

Tin algun hotel na Aruba cu ta brinda e tipo di infrastructura aki, pero esaki no a wordo generalisa pa e infrastructura publico na Aruba. Sigur ta un tema cu ainda ta pendiente.