ORANJESTAD (AAN)- Via di DIARIO, e actriz Lenie Henttu-Jeandor ta haci e presentacion di su buki “Formacion di un actor”,
cu e ta dedica na e hubentud di Aruba y e Scol di Teatro “Juana Sujo”, situa na Caracas, Venezuela, den cual el a haya su formacion teatral profesional.
“Respetable hubentud di Aruba y na tur cu ta desea di forma parti di e gremio teatral, debi cu tin tanto restricción pa cu e pandemia, di presenta mi buki ‘Formacion di un Actor’ via di DIARIO.
Prome cu tur cos, mi kier a gradici Sra. Rafi Elisabeth-Statie, kende ta e persona cu a yudami drenta e scol di Teatro “Juana Sujo’. Di curazon danki amiga-colega Rafi.
Den pasado despues cu mi a skirbi y presenta e buki ‘Manual pa Escenario’ mi a haya e peticion di parti di varios persona pa skirbi e ‘Tecnica teatral pa e formacion di un actor’ pa e hubentud di Aruba. Tambe mi kier haci uso di e oportunidad aki pa sugeri e hubentud di Aruba con pa hiba un bida sano den e gremio teatral y gana respet di tanto productor como di director, elenco y ekipo artístico.
Den e buki ‘Formacion di un Actor’ tin opinion di tres Educador di Aruba.
Sr. Ito Tromp, Sr. Charles Croes y Sra. Luty Martinez. Tur tres tin e hubentud di Aruba na pecho y pa mi nan opinion ta un privilegio. Un danki di curazon tanto na Sr. Ito Tromp pa su opinión y kende a coregi e gramática, Sr. Charles Croes y Sra. Luty Martinez pa nan opinión, Sr. Alan Arends cu a diseña e kaft, Sra. Jeta Quilotte cu a traduci loke mi a skirbi na spaño 51 aña pasa, pa papiamento y tambe na Unoca kende a haci posibel pa e buki aki ta riba plaza awe.
E buki ‘Formacion di un Actor’ ta abarca tur mi conocimiento cu mi a adkeri durante e prome dos semesternan na ‘Scol di teatro Juana Sujo’ Caracas, Venezuela. Augustus 1976 pa Juni 1977
Te ainda mi tin e schrift cu ta un relikia y comprobante pa mi, pa cu loke mi a siña y skirbi. Pa esunan cu no sa, mi a skirbi e buki “Manual pa Escenario” después cu mi a tuma mi curso di stage-managing den seis diferente teatro na Broadway, New York na 1996. E ta abarca e trao di un Stage-Manager for di dia di Audicion te cu e dia di Presentacion. Tanto pa un Revista Musical (musical review) como cualkier genero teatral of cualkier otro evento musical.
Manera nos tur sa e gremio teatral ta rekeri vocacion y disciplina. Pa por eherce e trabao di un escritor, guionista, productor, director, actor of actriz, esaki ta rekeri masha hopi buskeda y dedicacion. E autor su idea, meta, creatividad y kico e kier logra pa cu su obra teatral, ta loke tanto e director como e actor mester sa di analisa y tambe memoriza. Pues, ‘e trabao di mesa’ ta sumamente necesario. Ta e forma con e obra teatral a wordo dirigi y con e actor/actriznan a interpreta e caracteristica y psicologia di cada personaje, tambe nan interelacion, gestonan, expresión corporal y Intensidad ta loke ta conta y por wordo considera como un trabao of actuacion profesional of no profesional.
Profesionalismo: Jeandor a sigui splica cu profesionalismo ta e manera of forma di desaroya un actividad cu responsabilidad y exactitud.
“Hopi bez mi a yega di tende expresionnan haci ‘Ta artista e ta’, cualkier trabao cu'n persona ta eherce ta un Arte. Pues... nos tur ta artistanan. Mi a mira y a keda impresiona di mira, con un Hardinero a cambia y drecha un hardin di un hotel cual ta un arte riba su mes. El a uza su imaginación y a crea. Pues... e Hardinero ey ta un Artista. Arte ta loke ta impresiona e sentidonan di e ser humano. Imagen-sonido”, Lenie a expresa.
Conseho na Hubentud: “No rebaha, critica, tene di bofon of discrimina un persona pa cu su físico si e ta den un grupo teatral. No core huzga pasobra ni un hende no conoce e potencial, talento, don y conocimiento di cada ken te ora cu e demostra esaki.
Tampoco bay tras di comentarionan, pasobra ni un hende sa cuanto di loke ta wordo bisa di un persona ta cuadra cu realidad” asina Lenie Henttu-Jeandor ta aconseha nos hubentud.
Sugerencia di un Director di Teatro: Oslin Boekhoudt (q.e.p.d), fundador di e grupo teatral mas bieu di Aruba, un di e miho directornan di obranan teatral na Aruba a yega di comparti cu mi un sugerencia valioso despues di a lesa e buki ‘Manual pa Escenario’. Su sugerencia tabata: ‘Jamas acepta kliek (camarilla) den un grupo teatral, pasobra esaki por trece desunion y e fundador tin pa lucha pa mantene e grupo activo y uni.
Pues ami a acepta e sugerencia. Mesun cos mi ta sugeri e hubentud di Aruba. Y ami ke bisa no laga egoismo, envidia, orguyo, hipocresia, intriga, tenemento di bofon, crece den boso curazon. Mas bien trata di siña di esun cu bo ta mira cu tin mas talento y conocimiento cu bo”, Lenie Henttu-Jeandor a subraya.
