Aruba Conservation Foundation a celebra cu bishitantenan special e lansamento di nan documentario

ORANJESTAD (AAN):    Esnan di Aruba Conservation Foundation (ACF) a laga sa cu  ainda nan ta sinti e emocion despues di a lansa e documentario 'Turning the Tide'

 y cu esey nan ta celebra e bishitantenan special cu a bin Aruba pa e momento special aki.

            Den e siman akinan, ACF tawata tin e placer di duna bon bini na Andrea Floudiotis y Karen Mahy di e Programa RESEMBID, hunto cu Rene Henkens y Ronald Osinga di Wageningen University & Research.

            Hunto cu partnernan local—ScubbleBubbles Foundation y University of Aruba, a bishita e diferente sitionan di restauracion pa wak e trabou cu a team a bin ta haci.

            Di bishita e silt trapsnan coba na Rooi Taki, Rooi Bringamosa, Rooi Lamunchi pa e area di Spaans Lagoen, e bishitantenan tawata tin e chance di wak e esfuersonan haci pa restaura e sistema ecologico di mangel den e area.

            Tambe nan a drenta awa pa snorkel pa bishita e rifnan artificial unda cu e coralnan a wordo planta y ta sigui crece riba e sistema di MARRS y MOSES localisa den Parke Marino Aruba Mangel Halto.

            Un DANKI grandi a bay na e bishitantenan pa tuma e tempo pa bin y wak con e proyecto piloto aki ta cambiando e direccion di restauracion di coral y mangel pa Aruba.

            Bo a wak 'Turning the Tide' caba? Tuma tempo pa bay wak e na The Movies at Gloria, Renaissance of Principal te dia 14 di februari 2025.