Presidente di FTA:
*Pues mester busca un solucion pa cu esaki
ORANJESTAD (AAN): Mirando e cantidad di hotel cu Aruba tin, unda cu recientemente mas a habri y tin mas na caminda, e pregunta ta si ta bay tin suficiente trahadornan pa traha na hotel, of si mester busca hopi trahador for di exterior.
DIARIO den un entrevista a puntra presidente di sindicato FTA Jose Figaroa tocante esaki.
El a splica cu hotelnan ta sigui expresa nan preocupacion riba e scarcedad di trahador cu tin.
Esaki sigur mirando cu mas hotel ta habri.
“Diferente hotel ta preocupa cu ta bay tin piscamento den laman di otro pa loke ta trahadornan, ora cu mas hotel habri”.
Si un hotel atrae un trahador di otro hotel, e ta crea un buraco pa e hotel ey y esey ta un preocupacion cu nos ta tende hopi di dje, segun Figaroa.
El a bisa tambe cu banda di esaki mester tene cuenta cu e hecho cu tin un cantidad grandi di empleado di hotel cu ta yegando edad mayor.
E forza laboral na Aruba ta consisti di alrededor di 50% di persona cu ta yegando edad halto, segun e presidente di FTA.
El a splica cu dentro di 10 pa 15 aña ta bay tin un cantidad grandi di trahador cu lo yega edad di pensioen, cu ta pone cu ta bay tin mester di otro trahadornan pa reemplaza nan.
“E mercado na e momentonan aki no ta provee suficiente trahador, pues nos mester busca un solucion pa cu esaki”, segun Figaroa.
