Aruba Bank y Impact Blue ta gradici tur scol cu a habri nan porta pa presentacion di ‘Circular Economy’

ORANJESTAD (AAN): Aruba Bank ta contento pa comparti e exito di e serie di presentacionnan di “Circular Economy” hunto cu Impact Blue na 10 scol basico rond di Aruba.

   E iniciativa aki tin como meta pa educa e hobennan y inspira nan riba e importancia di sostenibilidad y maneho responsabel di recursonan.

E presentacionnan adapta pa studiantenan di klas 5, a cubri aspectonan esencial di “Circular Economy”, stimulando e conocemento y comprension di practicanan pa cuida y conserva nos medio ambiente.

   Aruba Bank ta comprometi na crea concientisacion den e hobennan, promoviendo un futuro sostenibel pa nos isla.

   Nos ta entusiasma pa comparti cu un total di 6 scol a registra pa participa na e “School Challenge”, cu lo tuma lugar dia 22 di maart, na e sucursal principal di Aruba Bank na Camacuri. E dia aki, scolnan participante lo presenta nan proyecto y idea con nan lo aporta na “Circular Economy”.

   Aruba Bank ta reconoce e esfuerzonan di tur scol participante y ta contento pa anuncia premionan interesante pa e” School Challenge”. E ganadornan lo ricibi na promer lugar 10.000 Florin, na di dos lugar 7.500 Florin, y di tres lugar lo haya 5.000 Florin.

   Aruba Bank y Impact Blue ta gradici e scolnan, studiantenan, y tur docente pa nan entusiasmo y dedicacion na e proyecto di “Circular Economy”. E “School Challenge” ta promete di ta un celebracion di innovacion, creatividad, y un compromiso colectivo pa un Aruba mas conciente.