ORANJESTAD (AAN): Desde 2017 Aruba Bank a compromete su mes pa apoya Cas di Cultura den su obhetivo pa renoba e edificio.
E situacion di Covid-19 a forsa Cas di Culura pa ahusta nan plannan y por fin ariba diabierna, 23 di april, Aruba Bank hunto cu Directora di Cas di Cultura, Vicky Arens, por a bin hunto pa celebra inoficialmente e inicio di e proyecto. Esaki ta consisti di e reparacion di e dak di e edificio caminda e ta mas urgente, teniendo na cuenta cu e temporada di awacero pa 2021.
Marketing & PR Manager di Aruba Bank, Tamara Waldron a combersa cu Señora Arens y a ricibi un rond-leiding di e area cu lo worde renoba cu e ayudo di sponsorship di e banco.
Segun Señora Waldron, Aruba Bank ta contento di contribui na arte y cultura di Aruba y ta spera cu por realisa e soño di Cas di Cultura pa yega na convertie un bes mas na un centro pa comunidad caminda individuonan por bin hunto pa disfruta di exhibicion, pa tuma les di arte, baile of musica of pa simplemente pasa bebe un koffie den e galeria.
Señora Arens ta sumamente complaci cu e aporte di e banco comercial mas grandi di Aruba.
