ORANJESTAD (AAN) – Awe, Diaranzon 28 di April, henter mundo ta observa cu hopi atencion e Dia Mundial di Seguridad y Salud na Trabao. E tema pa 2021 ta “Inverti awe den sistemanan resiliente pa
garantiza seguridad y salud na trabao (SST)”.
Pa e pandemia di Covid-19 no tin pais grandi ni pais chikito y na henter mundo e golpi sinti ta enorme, y te ainda mundo no a sali afo di dje.
E pandemia aki a pone e gobiernonan, dunadornan di trabao y e poblacion en general enfrenta retonan sin precedente, relaciona cu e virus di SARS-CoV-2 y un cantidad di efectonan diverso cu a trece cune pa e mercadonan laboral, den cada pais y globalmente.
E Dia Mundial di Seguridad y Salud na Trabao ta centra su mes den e strategianan pa fortalece e sistemanan nacional di seguridad y salud na trabao (SST) cu e meta di desaroya resiliencia pa enfrenta e crisis y e experencianan di e mundo di trabao.
E Director General di e Organizacion Internacional di Trabao, Guy Ryder, y un panel forma pa lidernan mundial y representantenan di nivel halto di gobiernonan y organizacionnan di dunadornan di trabao, lo ofrece puntonan di bista y lo mustra con e inversion den seguridad y salud laboral, tanto for di e punto di bista practico como financiero, ta contribui na un infrastructura mas solido na nivel nacional, y con por prepara pa responde na un crisis manera Covid-19 y eventonan similar.
ARUBA:
Aruba, maske con chikito nos pais ta, Covid-19 sigur a trece cune un situacion hopi delicado den nos mercado laboral, unda a surgi hopi desempleo, na e momentonan aki hopi hende ta sigui depende di FASE y subsidio di trabao, y incluso, ta conoci cu hopi abuso laboral a tuma lugar y ta sigui sosode. Hopi tata y mama di famia despues di a biba dignamente cu nan salario, nan stabilidad economico y emocional a deteriora pasobra nan entrada a baha considerablemente, mientras nan yiunan ta sigui demanda mas atencion, cuido, y gasto cu tin biaha no por cubri.
Pues, awe enberdad ta un dia pa reflexiona for di tur punto di bista y actua: pueblo, gobierno, sector priva, trahadornan y sindicatonan pa asina Aruba tambe logra su resiliencia den seguridad y salud cu fuentenan di trabao fuerte, stabil, y solido.
