ORANJESTAD (AAN): Den fin di siman N.V. Elmar a tuma nota di un reclamo riba social media en cuanto e lusnan di caya den Promenade San Nicolas cu no ta cende.
E compania NV Elmar a aclarea cu diferente luz di caya no ta cay bao maneho di e compania, incluyendo esnan di e Promenade San Nicolas y Bernhardstraat.
Recientemente ariba invitacion di Minister President Evelyn Wever-Croes a inicia combersacionnan entre su departamento, NV Elmar, DOW, DTI, y algun stakeholders mas pa asina bin na un solucion mas pronto posibel pa e lusnan aki por funciona bek.
E compania di electricidad a confirma na DIARIO si, cu ta intencion pa pasa tur luz di caya pa NV Elmar pero esaki no a ser concretiza ainda.
Fuera di e lusnan den Promenade, tin mas lusnan di caya cu tambe ta cay bao di maneho di Dienst Openbare Werken (DOW) of compania priva.
Nan ta: Bernhardstraat (entre e rotonde banda di FTA te ex-WEMA), Green Corridor, Watty Vos Boulevard, Linear Park (entre rotonde Las Americas te brug di Lagoen), Wilhelmina Park, Plaza Betico Croes, e luznan di acera dilanti Lowrise Hotels y tambe Highrise Hotels, e caminda pa Lighthouse (Arashi pa Faro Blanco), y e lusnan dilanti di edificio di Parlamento (L.G. Smith Boulevard).
Enberdad e situacion ta crea hopi confusion serca pueblo y NV Elmar ta comparti e preocupacion aki.
