Di awor caba por pre-aplica pa cumpra auto nobo
ORANJESTAD (AAN): Despues di a keda warda algun aña pa e momento oportuno, riba Diabierna atardi na Aruba Bank na Camacuri a divulga cu e evento grandi di bendemento di auto, esta “MEGA” ta bin bek.
Stephany Camacho kende ta Senior Marketing Manager di Aruba Bank, hunto cu Lizani Wever kende ta Manager Retail Sales & Services, a confirma cu nan grandioso evento y campaña tey bek awor pa 2023.
Aruba Bank tey bek cu e evento di bende auto di mas grandi na Aruba, ‘MEGA’ pero cu a dicidi na dune e nomber di ‘MEGA The Return’.
Y prome cu e evento mes, nan lo start un campaña cu ta cuminza Dialuna awor 20 di Augustus, y esaki lo yega su fin riba e dia grandi cu ta Diasabra 2 di September 2023, pues e evento MEGA The Return.
Segun Wever, MEGA The Return lo tuma lugar riba parkinglot grandi di Aruba Bank na Camacuri for di 6:00 pm te cu 9:00 pm, unda Car Dealernan local lo ta expone diferente modelo di nan autonan y lo bay tin tur representante di Aruba Bank pa asina haci ofrece aprobacion eynan mes pa e clientenan.
Clientenan cu yega eynan e anochi ey, lo sa di antemano caba cu nan a wordo aproba door di banco, danki na e campaña di pre-aprobacion cu lo start Dialuna awor caba.
E anochi di evento, lo bay tin entretenimento musical. E organizacion caritativo Rotaract lo bay tey ta recaudando fondo como tambe bende cuminda y bebida. Lo bay tin un Skina pa Muchanan, y hopi mas.
Con pa aplica di awor caba: Si bo ta interesa den un auto durante MEGA The Return di Diasabra 2 di September, anto entrante Dialuna caba bo por cuminza aplica pa cumpra un auto.
Lizani Wever a indica cu e cliente tin diferente opcion con pa aplica. Bo por haci e e-appointment. Of bo por start na bo Car Dealer preferi unda bo ta bay cuminza e auto cu bo ta desea, y asina manda e papelnan. Of por pasa via sucursal y un representante ta cla pa yuda.
Aruba Bank lo bay ta dunando aprobacion dentro di 24 ora, pa asina e cliente na forma rapido ta haya sa su status pa e compra di auto.
Beneficio di MEGA The Return: Segun Lizani Wever, e beneficio cu e campaña ta e.o. e chens cu e cliente por cumpra awor y cuminza paga bek te aki 6 luna (pues lo cuminza paga bek di Maart 2024 en adelante).
Wever a mustra cu e interes e biaha aki ta hopi atractivo, esta di 5,25% pa autonan di gasolin, y 5,00% pa autonan hybrid of electrico. Lo bay ta ofrece diferente descuento pa Aseguro di Auto, y e cliente por aplica caba cu 0,00 Florin di Downpayment.
Ademas di esey, MEGA The Return lo bay ta rifando dos premio atractivo na 2023 aki, unda cu esnan cu firma contract tin chens di gana 10 mil Florin pa prome premio, y 5 mil Florin pa segundo premio. Esaki lo ta den forma di descuento cu e lo haya riba prestamo cu e cera cu Aruba Bank.
Riba arubabank.com/mega2023 por haya mas detaye, incluyendo rekesito pa aplica cu ta un rijbewijs valido, dos payslip di ultimo lunanan (4 payslip si ta cobra pa quincena). Si acaso ta aplicable, mester di copia i permiso valido, carta di trabao, y e car-order pa escogencia di auto.
